what's in my bag post :)

قبل أسبوع تقريبا كنت منضغطة حيل ومحتاجة بريك ، سويتلي تسوق علاجي ..رحت السوق وحرفيا قمت ادش المحل..  اللي يعجبني اخذه واروح الكاشير احاسب ،   وصراحة هالحركة حييل طلعتني من المود اللي كنت فيه وحسيت اني جددت طاقتي ..مع العلم انه كل اللي خذيتهم شغلات سخيفة ما تسوى ..بس عجبتني ;) 

 

 

جنطتي اللي بالبوست منهم ..وحيل مستانسة عليها ، اهية كروس والبرنت  المورد اللي عليها  بخليها من اغراض حوستي من الحين ليه الصيف .. المهم واضح جدا من اسم البوست انه بوريكم شنو داخل جنطتي - اللي حيل مستانسة عليها -

 

 

 

 

 

1- بوك  خذيته مع الجنطة نفس نقشتها لأني وحدة أحب أطقم  واللي عجبني بالبوك انه له مسكة بحيث اني اقدر اخذه بروحه حق المشاوير السريعة وحجمه يشيل فوني  واقدر أحطه بكبره فيه ويصير بوكي اليديد جنيطة صغيرة حق روحة بقالة  او نزلة بنك .

 

2- فوني + راوتري المتنقل 

 

3- نظارتي الشمسية وهذي أحدث نظارة اقتنيتها ، شريتها برحلة التسوق العلاجي اللي خذيت فيه الجنطة والبوك ، ستايلها قديم شوية بس حبيته ، ماركة dc  الإيطالية .

 

4 - العلبة الصغيرة البنية هذي أحط فيها حبوبي ..أنا أخذ حبوب مقوية للشعر وحبوب ملتي فيتامينات من عقب الولادة  وليلحين مستمرة عليهم .

 

5- كريم مرطب للايدين تركي ما استغني عنه اهوه وزبدة الكاكاو ...لزوم التعايش مع شمسنا اللطيفة .

 

6- نوتة متوسطة الحجم اكتب فيها كلشي ومقسمة بالأشهر شزييينها ترتب أفكاري وخططي ومشترواتي وميزانيتي ومواعيدي  وأهدافي ...طالبتها من الانستقرام .

 

7- مبرد  لحالات  كسر الأظافر  وايد يفيدني .

 

8- منظرة ..هالمنظرة عندي اياها من كنت بالمتوسط .

 

9- البوك الأسود فيه تربة حق الصلاة .

 

10 - وأخيرا سويجاتي اللي معلقتهم كلهم بمدالية وحدة .

 

 

ودمتم ساااالمين .

 

 

 

 

 

book review : ( فئران أمي حصة )

 

 

 

 

الكتاب الجيد اهوة الكتاب اللي ما تقدر تهده وتستعيل بانك تخلصه وتعرف النهاية ، ولمن تخلصه تتحسف بانك خلصته بسرعة لانك كنت مستمتع فيه .

رواية (فئران أمي حصة ) للكاتب الكويتي سعود السنعوسي من الكتب اللي توني الحين خلصتها ، وكنت مستمتعة بكل جزء منها لمدة اسبوع ، وقرار منعها من الكويت خلاني اكتب عنها هالبوست .



القضية الأساسية المتداولة في القصة اهية الاحتقان الطائفي بالكويت بين السنة والشيعة ، تاخذنا القصة منذ بداية شرارتها بتفجيرات القهوة الشعبية عام 1985 وليه حتى عام 2020 اللي يتخيل فيه الكاتب شلون الوضع راح يتطور وتحال إليه الأمور .



قصة جيران كويتين سكنوا بمنطقة السرة ، وصداقة ثلاثة من صبيانهم الصغار (فهد وصادق وبطل الرواية اللي ما نعرف اسمه ) وتطور صداقتهم مع كبرهم مع بعض وتزامنهم للأحداث اللي مرت فيها الكويت مرورا بأكبر حدث صقل قضية الاحتقان الطائفي : الغزو العراقي الغاشم للكويت .



ما أبي اتكلم بتفاصيل القصة عشان ما احرق أحداثها للي حاب انه يقراها ، 440 صفحة مليئة بالقصص والأحداث اللي راح تخليك ما تقدر تهد الكتاب بنهاية كل فصل ، سعود السنعوسي قدر باسلوبه الابداعي المليء بالتفاصيل انه يخليني امشي بمنطقة السرة بفترة الثمانينات واعيش جو الكويت المنشحن حزتها و اسألته الكثيرة اللي يطرحها ويدق فيها ناقوس الخطر حول نهاية المشادات اللي قاعدة تصير بين الطائفتين ، ورصدته لكل التغيرات اللي مرت بالكويت خلال هالفترة ، تخليها عمل يوثق تفاصيل من تاريخ الكويت المعاصر بدقة واسترسال راح نلجأله بالمستقبل لمن نبي نوثق التاريخ الكويتي والبيئة الاجتماعية الكويتية .



حبيت شخصية أمي حصة حييييل ، شخصية طينتها خفيفة وقطاتها ذكية ، وكانت عمود الرواية الأساسي اللي استقت منه جمع الشخصيات مع بعض ، ومرجع الأحداث لبعضها .



قراءة القصة كانت متعة بالنسبة لي وما عاقني كبر حجمها وكثرة صفحاتها ، بالعكس الاحداث اللي فيها والسيناريو اللي رسمه سعود السنعوسي لها يستوعب هالكم ، وكلش ما اعتبرت قرائتي لها تضيعة وقت .



اللي عجبني بالرواية أنها أول عمل يمر علي متناول قضية التناحر الطائفي بالكويت بهالشفافية ، وهالدقة ، وهالنضج و هالوضوح ، دون الإساءة لطائفية بعينها ، الكتاب ما نقد طائفة بعينها ، الكتاب نقد التطرف من الطائفتين .. وشلون ربط هالشي بنداءات شخصية فؤادة في مسلسل (على الدنيا السلام ) : الفئران أتية ..احموا الناس من الطاعون ! ، وهذا من إبداعاته ، وشطارته . تكلم عن الاختلافات بين الطائفتين باستفاضة : الفرق بين نطق منطقة العمرية والعميرية ، موقف الطائفتين من من اعدموا في مكة من الكويتين ما بين اعتبارهم شهداء أو إرهابيين ، صيام عاشوراء او البكاء عليه ... والكثير .



اللي حابة أقوله بالنهاية ، إنه إذا كنا احنا وايد متحسسين من اللي تناوله سعود السنعوسي بالرواية بحيث انه يسلتزم منعها ، فمعناته اللي تحذر منه الرواية موجود والله يستر من الياي ومن تنبؤات سعود فيها .



سعود السنعوسي كاتب كويتي قريتله عملين ، رواية (ساق البامبو ) ورواية (فئران أمي حصة ) وهالكتابين افتخر بمستواهم الأدبي والروائي اللي وصلوه لجائزة البوكر للإبداع في الكتب العربية .

هموم  أم جديدة

the new mother talk

 

 

 

 

 

وضع يديد علي، طبعا كلشي يبيله فترة على ما الوحدة تتأقلم وتضبط وضعها وتتعود عليه ،  وصج إني تحملت المسؤولية من تزوجت،  بس من صرت أم تحملت مستوى يديد فيها  ،  الحمد ظروفي واايد مهيئتني اني اجتاز التجربة بنجاح ، الحمد لله لوجود الخدامة وإجازة الوضع والأمومة ، بس تعب الأمومة وقلة النوم كفيلين بانهم يخلون أي وحدة تحس انها مو قد الموضوع ، خصوصا من صرخات البيبي بالليل وانتي بعز نومج وانتي مو عارفة شنو اللي زاعجه بالضبط .

 

 

طبعا أدري أنه هذا الكلام مو مفاجاة بالنسبة لي ولكم ، الكل يدري انه اليهال ما ينامون والغازات أو أحلامه تزعجه أو حتى أيده ممكن تخرعه ، والمفروض أكون متهيأة حق هالشي ومتوقعته ..وهذا اللي صار ، بس السؤال اللي ظل يرن ببالي ليلة أمس وأنا حايشتني افلونزا تالي الليل وراسي مصدع واهيه تصرخ من عوار بطنها وأنا شايلتها بأيد والأيد الثانية تكرمون ماسكة قوطي الزبالة وأرجع فيه _ سوري عالدقة بالتفاصيل بس عشان أوضح لكم الصورة _ ، اهوه انه الحياة المفروض تكون تسهلت للأم بانها تقوم بدورها برعاية طفلها بكل سهالة خصوصا في زمننا هذا .. أول ما كان فيه كرسي للسيارة ، ولا كان في كرسي للبيت ، ولا كان في عربانات ، ولا كان في دوا غازات ، ولا كان في حفاظات أصلا وهالشي يثير نوع يديد من الأسئلة بخصوص النظافة والطهارة ! بس ماكانت الأم تتعب كثر ألحين ، ما كانت تشتكي من قل النوم ولا كانت تبجي من هده بدنها .. صارت فيني واايد بلحظات كنت أختلي فيها بنفسي ....

 

 

 

لا تفهمون كلامي غلط ، والله العظيم مو قاعدة اتشكى ...بس اعتبروا هالبوست نوع من أنواع الفضفضة اللي أنا محتاجتها ، بعد ما أقول هالكلام اللي يعتبر كلام منمق والكل قاله بس والله صج ، التعب اللي تحسه الأم ..خصوصا بالليل يروح وأنساه بلحظة لمن ديوم تمسك أيدي واهيه مو حاسة ، جنها تقولي أنا محتاجتج عشان تريحيني ، بس هاللحظة تسوى ألف حفاظة طافحة تحتاج ديمة عقبها غسيل تالي الليل ، وتسوى ألف روحة وردة بأنصاف الليول لأن الاخت ديمة تبي تدوخ وما تدوخ إلا لمن نحوس فيها وإحنا أساسا دايخين ....

 

 

 

المقبلات على الأمومة ما أبي أخرعكم أو أكرهكم بالوضع بس بعطيكم مجموعة من النصايح بحسب تجربتي اللي مريت فيها ولازلت قاعدة اتأقلم وأتعلم فيها :

 

 

 

1- لا تحاولين تكونين بطلة ..انتي محتاجة للراحة ، أول واوضح شي ممكن يساعدج اهوه وجود الخدامة - في مجتمعنا - ووجود الريل -في مجتمعات أخرى - ، مو معنات أنج تكونين أم صالحة لازم تقومين بكل شي بأيدج ، لأنه حزتها ماراح تلحقين ..اشرافج يكفي في بعض الأوقات  عشان تشحنين طاقتج ، والله يعين اللي ما عندهم خدم ، الله يطول بأعمار امهاتكم وأهلكم عشان  يساعدونكم .

 

 

 

2- نصايح التربية والعناية بالطفل وااايد راح تسمعينها بكل وقت وزمان ومكان ، منها الحديث ومنها الطريقة التقليدية اللي اهيه طريقة أمهاتنا ويداتنا ، الأمر الوحيد اللي راح يحدد أي طريقة تستخدمين اهيه أنتي ، اتبعي احساسج وسوي اللي يريحج  ..لأنه باختصار ماكو طريقة مثلى لتربية الطفل ، وكل طفل يختلف عن الثاني بالطباع والوضع وطبعج انتي بعد كأم ، يعني مثلا سالفة انج تطلعين البيبي من بيته وتاخذينه معاج اماكن عامة خصوصا في اشهره الاولى  او الخيار بانج تخلينه بالبيت أأمنله وأحفظله وأريحلج هذي شغلة خاصة فيج وحسب قدرتج انتي مو اهمه ولا يحسسونج بالذنب اذا اتبعتي أي من الطريقتين .

 

 

 

3- قرار الحمل وانجاب طفل سواء بأول الزواج أو عقب فترة ..يختلف بحسب رغبة كل وحدة وهم رغبة زوجها وظروفهم طبعا الاجتماعية والصحية إذا تسمح..بس نصيحة لا تييبون يهال الا اذا كنتوا تبون ، وليس ارضاءا للناس ...وهذي احط تحتها مليون خط أحمر ،لأنه بشكل بديهي انتي اللي بتحملين وانتي اللي بتتنسين وانتي اللي بتولدين وانتي اللي بتسهرين بالليل وتراكضين عالبيبي من طبيب ليه طبيب .

 

 

 

ووووبس ..كلمتين كانو بخاطري أقولهم :)

 مبروك المدام حامل :)

..شعور جدا جميل وممتع ويخوف ومحير بنفس الوقت ، خصوصا حق اللي تحمل باول طفل ، حبيت أنزل بوست يفيد الأمهات اللي لأول مرة يجربون هالتجربة  الغنية بمراحلها وتوقعاتها وواقعها .

 

 

بوستي اليوم بتكلم فيه عن الأشيا اللي حيل حبيتها وما استغني عنها بهالفترة واعتبرهم صاروا أصدقائي الصدوقين :)

 

 

 

بأول فترة من الحمل خصوصا الثلاث أشهر الأولى وهي فترة النساة اللي كانت حيل غثيثة ومليقة بالنسبة لي ، ما كان وجبة تظل بمعدتي حرفيا ..ما أنقذني إلا حبوب (أوندا ) ..من خذيتهم وانا احس جني كنت أجذب ، مفعولها وايد حلو ويروح الشعور بالغثيان والترجيع  نهائيا بالنسبة لي ..ما أقول بس الا (أوندا) يا بعد (اوندا )

 

 

 

 

 

 

 

 

الترطيب وااايد مهم حق بطنج وصدرج ، كل ما بجرتي بعملية ترطيبة كان وايد احسن حق بطنج عشان تخففين من ظهور خطوط التمدد ، وحق صدرج عشان يستعد حق فترة الرضاعة لانه راح يتكون فيه الحليب ..أنا شخصيا من اول ما حللت ودريت اني حامل  مريت (بوتس ) وخذيت البايو أويل وايد مفيد وحلو ، وهم عقب جم شهر خذيت من محل متيرنتي للحوامل اللي ب360 كريم بالمرز للوقاية من السترج الماركس بفترة الحمل ...يفضل الترطيب مرتين باليوم لنتيجة وايد حلوة .

 

 

 

 

 

 

 اسبوع عن اسبوع  وضعيات نومج راح تنحد كلما كبر بطنج ، وبالنسبة حق اللي متعودة تنام على بطنها وتحب هالوضعية راح تتعبين بالبداية -مثلي -  ، بس اللي حيل راح يساعدج لمن تنامين على جنب وبطنج يثقل ويتعبج  هالمخدة من مذر كير ، وايد تريحج وراح تفيدج عقب الولادة حق رضاعة البيبي ..في اللي أكبر منها وتقدرين تلفين جسمج كله فيها بس انا فضلت أخذ هذي .

 

 

 

 

 

 

 

دخلت الشهر الرابع وافتكيت من النساة الغثيثة المليقة ، طلعتلي سالفة الحارج المزمن ، اللي كان بالنسبة لي زي العسل مقارنة بلوعة الجبد ، فحلي بهالمرحلة اهوة دوا (جافيسكون ) اللي اشربه ومخليته يمي على طول واشربه مثل الماي ..وااايد يخفف الحرارة اللي راح تحسين فيها .

 

 

 

 

 

 

 

أنا لبسي من قبل الحمال كان اغلبه وسيع فما فرق على الوضع وايد الحين ، بس بنطروناتي بديت اتأزم منهم من اول ما دشيت بالشهر الرابع ، الحل موجود عند محلات مترنتي ، بنطرونات الحوامل عندهم تهبل مرييييحة جنج لابسة بنطرون بجامة مو جينز ووايد بنات قالولي انه ظلو يلبسونهم ليه عقب الولادة .

 

 

 

 

 

 

كتاب ماذا تتوقعين عندما تكونين حاملا ، كتاب شامل وفيه معلومات وايد اعتبره مرجع عندي وحاطتة يمي عالكمودينة قبل ما أنام ، وايد مفيد ، يتكلم عن الحمال أسبوع باسبوع بكل ما فيه  من أعراض ، حالة البيبي ، حالة جسمج ، شنو اللي تتوقعينه ، شنو اللي تتجنبينه ويجاوب عن أسالة بخاطرج أو شائعة ، أنصح كل حامل يكون عندها نسخة منه .

 

 

 

أحب أقول بالنهاية إن أهم شي بفترة الحمل انج ما تتعاملين معاه كحالة مرضية ، اهوة وضع صحي دقيق يحتاج عناية خاصة لا أكثر ولا أقل ..طبعا الحمال يفرق من وحدة ليه وحدة بكل مراحلة ، فيه حريم وايد يتعبون بهالفترة وفي حريم ما شالله ما يبين عليهم حتى .. اللي لازم تحطينه ببالج انه راحتج وسلامة البيبي أولا ، ثانيا اخذي الكلام من المختصين والخبرا والدكاترة ولا يضيعونج الحريم حتى لو من باب النصيحة لانه كل جسم يختلف عن الثاني ، وأخيرا النصيحة الأهم : استمتعي بهالفترة ...حتى لو كانت صعبة ، كوني فخورة بإن جسمج قاعد يصنع طفل كامل وهذي ميزة الله خصنا  فيها يالحريم .

 

 

 

 

 

 

 

 

 

 

احب تلقائيتها بكل شي ..اكثر انسانة مرت علي بالتلفزيون تريح اعصابي لمن اشوفها لأنها ما تتكلف بولا شي ، لا بأداء ولا بكلام ، لابلبس ولا بمكياج ، ..الإنسانة الوحيدة اللي تحسسني اني اقدر اكون جميلة باقل القليل ، وبدون جهد ..معتزة وايد بملامحها الاساسية وقاعدة تتعامل معاهم على اساس انهم نقطة قوة بشكلها ..تغير باللوك وتهتم بروحها وتجدد على بس بدائرة وحدة ما تطلع عنها لانها تحب شكلها وملامحها وصج فعلا قدرت انها تكون ايقونة ستايل و نوع من انواع الجمال اللي أنا شخصيا أفضلها وأحبها . اشوفها مثال حقيقي حق الشي اللي ادعوله : تقبلي عيوبج وابرزي مواطن قوتج .

 

 

 

 

 

 

 

 

 

 

مكياجها دائما وابدا بسيط يعتمد على ابراز جمال لون عيونها  الخضراء  فما  حست انه له داعي بانها تكثر ألوان او تغمجه ..والنتيجة اهيه لمن شفناها بدون مكياج  ما اخترعنا ولا انصدمنا ..كل مرة تكون بالمكياج احلى من بدونه ، بس  مو حلو انه يطلع ويه ثاني غير ويهج لمن تغسلين مكياجج .

 

 

 

 

 

 

 

 

 

 

 

عرفت انه من احلى ملامحها شعرها ، قصة شعرها في مسلسل فرندز بموسمة الثاني اهيه اللي شهرتها واغلبية نساء الولايات المتحدة الامريكية حزتها كانو يطلبون (قصة ريتشل ) - اسم شخصيتها بمسلس فرندز - بالصالونات لمن يروحون لها ، وعرفت انه اللون اللي يناسبها الأشقر فعمرها ما غيرت عن هاللون بتدريجاته وان حبت تغير صبغت بني بدرجاته ، وكثافة شعرها ماشالله تساعد على انه يكون طويل وهو بالضبط اللي صاير وان حبت تقصه قصته بحيث ما يتعدى طول حنجها عشان ما تبرزه لأنه حنجها وايد كبير ومو حلو .. مو نفس وائل كفوري اللي نحت حنجه وعفس ملامحه ..لانها تفضل الطبيعية بكل شي ..أكيد الاخت تسوي رتوش تجميلية ، مستبعد جدا انه ممثلة هولوودية ما تكون تعاملت مع مشرط جراح او ابرة خبير تجميل ، بس كله في حدود المحافظة عالشباب والنضارة والتلقائية باللوك ..مو نحت الويه وتثبيت ملامحه بشكل بلاستيكي يخرع ..

 

 

 

ثانيا الجسم ، اهيه ضعيفة وناعمة ، بس جسمها له عيوبه ، مرات كرشتها تنط وطلعت لها جم غلطة بانها لبست شغلا ت ضيجة ، بس اهيه عارفة انه أحلى ما في جسمها ريولها ، فوايد تعتمد عالقصير بظهورها بالمحافل الاعلامية ..مرة ثانية (ذكاااااء في التعامل ما ما تملك ) ..

 

 

 

 

 

 

 

 

 

طبعا بالنهاية لازم انقد مرات بساطتها اللي تكون في مناسبات معينة واايد اوفر ، مثلا شكلها في عرسها من براد بيت و أغلبية لوكاتها بالاوسكار ..ميخالف لا تركبين رومش واكستنشن وتلبسين جيبون تحت النفنوف ..بس عاد رفعي شعرج عالأقل .

 

 

ماكو فايدة حريم لازم نطلع عيب بالنهاية ههههههه .

 أنا انسانة محظوظة بإني قدرت اغير  مكان دوامي لمن ما عجبني ..

لله الحمد الله سهلي انتقالي لمكان يديد  عقب ما اكتشفت اني لو مكملة بمكاني القديم راح اتحول مع الوقت إلى مكينة جامدة تروح الدوام تفكر شنو تطلب فيه حق الريوق ، تتهاوش مع المراجعين وتحقرهم إذا بغت و تقضي وقتها تحش مع  الموظفات بباجي الموظفات اللي معاها وبس .

حسيت انه مكاني جامد وتعيس وماراح اتطور فيه إذا ظليت فيه  ..

 

طبعا تقدرون تستنتجون انه أنا كنت بوزارة حكومية لان هذي  اهيه السمات الرئيسية لها  بالديرة للاسف ، مكاني اليديد تقريبا نفس النظام  بس وايد افضل لمسماي وشهادتي والبيئة اللي اختلط فيها ، هالشي ريحني لأنه انا انسانة تستحق الأفضل ودايما اسعو للافضل يا جماعة ..هالشي من حقكم ولا ترضون بالقليل ان كان مو عاجبكم (هالنصيحة اتبعوها بالشغل وبغيره من أمور الحياة ) ..

 

 

 

المهم ..خلونا من فكرتي اليديدة عن منظوري بالحياة وبقولكم مجموعة نصايح لاي موظفة يديدة بادية حياتها العملية أو حتى قديمة إذا تقدر تستفيد منهم ..

 

 

اولا :  عرفي اللي لج وعليج :

إذا كنتي موظفة بوزارة عرفي انه لج أربع استئذانات بالشهر \ أربع عرضيات بالسنة (اللي اهمه الإجازات الطارئة ) \ 15 إجازة  طبية بالسنة وحاولي تقللين من أخذهم كثر ما تقدرين عشان ما ياثر على تقريرج السنوي

 

 

ثانيا : حرصي انه يكون تقريرج السنوي امتياز :

 لانه تقريرج الامتياز يترتب عليه حصولج على مكافاة الاعمال الممتازة كل سنة (البونص ) ، وحصولج على  الإجازات الدراسية والبعثات الدراسية اللي يقدمها مكان عملج .  واذا ما خذيتي فيه امتياز تظلمي منه عشان يصير امتياز، واذا ما نفع التظلم بوزارتج تظلمي بديوان الخدمة  وبالفتوى والتشريع  حسب  الاجراءات المتبعة اللي راح يقولونلج عنها الشؤون القانونية بمكان عملج .

 

 

ثالثا : اخذي المعلومة من مصدرها ولا تعتمدين  على حجي باجي الموظفات :

عندج سؤال عن الإجازة روحي قسم الإجازات ، عندج سؤال عن تظلم روحي الشؤون القانونية ، عندج سؤال عن  الراتب واستقطاعاته روحي المالية وهكذا ...

 

 

رابعا: استفيدي من الدورات اللي تقدمها وزارتج لموظفيها :

حرصي على انج تاخذينهم كثر ما تقدرين أولا لانها مفيدة  لج بمعلوماتها ، ثانيا فرصة لكسر الروتين بإنج داومين برة الوزارة بفندق او مطعم  ، ثالثا راح تنحط بالسيرة الذاتية مالتج وهالشي راح يفيدج عشان تترقين  أو إذا بتنتقلين من مكان عملج .

 

 

 

انيي للجزء الحلو بالموضوع ..اللي اهوه النصايح الاجتماعية بالدوام :- 

 

1- يمكن راح تنصدمون من كلامي بس خل ياخذون عنج فكرة من البداية انج موهينة وما تسكتين عن حقج ، ولا ياخذون عنج فكرة انج حليوة وطيبة وهينة عشان لا يركبون على راسج ، ميخالف دشي عليهم بقوة .. ما أقول تهاوشي من أول يوم وتلاسني معاهم ، بس اذا ما شي ما عجبج لا تسكتين وينوكل حقج ، خل يحطونلج حساب ، نصيييحة لوجه الله .

 

 

 

2- باب الحطات والعطايا والمناسبات الاجتماعية : باب لازم تتعاملين معاه بذكاء وحذر ، لأنه اذا انفتح ماراح يتسكر وراح تبتلشين ، انا مو ضد العطايا اذا كنتي تعزين اللي معاج بالدوام وبينكم علاقات شخصية برة الدوام ، بس انا اتكلم عن عطايا المجاملات البايخة بين الموظفات اللي معاج اللي تفتح باب المطالع ، ويبتو حق فلانة وعلانة بولادتها و رجعتها من الاجازة وأنا ما يبتولي ..يبا سكري الباب ولا تقعين بالفخ  .

 

 

 

3- قيل وقال : فلانة قالت ..فلانة سوت ، فلانة تتكلم عنج ،  تعاملي معاهم تحت هذا الشعار ( العيب مو من قال ..العيب من سمع ) واساسا من زين اللي قال عاد !   

قبل أن تتزوجي !

 

 

 

كوني انتي وعرفي شنو تبين بهالحياة

 حطيلج تصور حقج بشنو انتي تبين تكونينه ، تبين تكونين ربة منزل ، تبين تكون موظفة ، تبين تبنينلج مهنة وتنجحين فيها ، تبين تلتزمين دينيا ، تبين تهاجرين ، شنو ما كنتي تبين تسوين

  لمن تعرفين شنو تبين بهالدنيا  واخترتي مسار حياتج مسألة اختيار شريك حياتج راح تسهل عليج وايد ،  لأنج راح تختارين شخص يتوافق مع خطتج ومسار حياتج

 واذا كنتي اوريدي بمرحلة الاختيار بس ما تقدملج شخص مناسب راح اييج الشخص المناسب بعلم الطاقة لا تحاتين ، لأنه الأطراف المتشابهة تجذب بعض

 

 ..شفتوا بأفلام الكرتون شلون دائما وأبدا الشخصيات تلتقي بشخص يشبهها في نهاية الفلم ويحبها بالنهاية ، بالضبط هذا اللي راح يصير معاج .

 

 

الواحد ما يتحكم بالنصيب ، اذا يه الشخص المناسب ما اشجع الوحدة انها ترفضه

 بس أنا وحدة ما افضل الزواج المبكر ، يعني دائما افضل الوحدة ترتبط عقب ما تخلص دراستها

 أولا :عشان اهيه تنضج وتعرف شنو اهيه تبي 

 

 ثانيا :عشان تتفرغ للزوج والحياة اليديدة ..

 

والطموح يا بنات

 هالله هالله بالطموح

 اسعوا ورا احلامكم ولا تهملونها عشان ريال

 اخذيلج ريال يعينج بحياتج

 اذا حسبالج مسألة انج تطمحين راح تنحش الريال منج فإنتي غلطانة ..

سوري على هالكلمة بس ماكوشي sexy حق الريال غير بنت  تسولفله عن طموحها

 أصلا جذيه راح تساعدينه اهوه يبني نفسه واسمه وحياته .

 

الطموح اللي اتكلم عنه مو بالضرورة يكون مهنة  ناجحة ، أو اسم أو شهرة

 الطموح عبارة عن أهداف واضحة ترسمينها لنفسج وتسعين لتحقيقها

 ممكن يكون هدفج شي بسيط  جدا مثل حفظ القرأن ! أو تربية حيوانات ببيتج

 المهم تكون عندج رؤية واضحة للشخصية اللي تبين تكونينها عشان تعرفين منو تبين ترتبطين فيه .

 

وايد زيجات فشلت لسبب بسيط جدا-من وجهة نظري -  

 الصبي مافيه شي ، والبنية ما عليها قصور ،

 

 بس المشكلة كانت بالاختيار الخاطئ ، وليش صار هالاختيار الخاطئ ؟

 

لأن واحد من الطرفين مو عارف اهوه شنو يبي ، هذا اذا ماكانوا اثنينهم مو عارفين !

 

 

ما أحب ألعب دور المصلحة الاجتماعية او الللي تسوي روحها عارفة وفاهمة بكل شي ..

بس شي حبيت انبه عليه البنات بمجتمع ما يصبر على البنت انها تنضج على ما تتزوج

شغلة وحدة خل تكون ببالج ......عرفي شنو تبين بدنيتج قبل ما تدشين دنيا غيرج .