منو أميرة ديزني المفضلة عندج ؟

 

قصة حب ..عصاة سحرية ...أصدقاء حيوانات ..ساحرة شريرة تكون نهايتها قشرة ..واغاني متنوعة تعبر عن كل حدث تمر فيه قصة الأميرة  ... عناصر تتكرر في أغلبية أفلام ديزني الكارتونية ، وهذي العناصر اهيه نفسها مكونات حلم يدغدغ مخيلة كل بنت  عاشت وتربت وهي تتابع روائع ديزني ، أنا وحدة من ملايين البنات اللي ليه يومكم هذا اتابع كرتونات ديزني وانطرهم ليه نزلوا بالسينما ..

من صغري وانا أحب شعر إريل الكثيف الاحمر (حورية البحر ) ، وكنت ولازلت معجبة بنفنوف بيل الأصفر المنفوش (الجميلة والوحش ) ، وولازال فلم (شركة المرعبين المحدودة) يؤلم عضلات بطني من شدة الضحك ، طبعا ناهيك عن فلم (حكاية لعبة ) اللي ما أتوقع أني اول وحدة تقول عن هالفلم إبداع بمعنى الكلمة بأجزائه الثلاث ، نجاح افلام ديزني ووصولها لقلوب الكبار قبل الصغار وتأثيرها الكبير على الصغار  شي مو بعيد عليهم نظرا لتعبهم وانتاجهم أفلام كرتونية مبهرة ممتعة مسلية بشكل كبير ، بس هذا مو موضوعي ..موضوعي اللي أبي اتكلم عنه اهوه أميرات ديزني ..أو بالأحرى قصص ديزني اللي تعلقنا فيهم واحنا صغار وشلون تأثرنا فيهم وكونوا عندنا قناعات معينة بدون ما نحس اعتبرناها من المسلمات ولمن كبرنا استوعبنا المسج الغلط اللي كانت توصلنا منهم ، لا تخافون ، ماراح اقول انها مؤامرة صهونية  الماسونيين قاعدين يغسلون مخنا فيها وأصير لكم الجزء الثاني من سلسلة (the arrivals) ..بس ترى صج اهيه فيها غسيل مخ ..بس من نوع ثاني !

 

خل اشرح لكم شلون صاير غسيل المخ :

 

اولا : كل أميرات ديزني تقول الزود عندي من الجمال ، عيون كبار ، جسم باربي ، شعر كثيف ، ورموش جنها مهفه النبي ..مو مشكلة ، البطلة لازم تكون حلوة عشان تجذب اليهال ..انزين والشريرة : جيكرة ، متينة ، خشمها طويل ، شعرها ما دري شلون صاير ، هالشي انا ما احبه ، لان يعزز السطحية عند الطفل ويخليه يحكم على الناس من شكلهم ..هذا غير انه يعزز عندهم مفاهيم غلط عن الجمال وينسف فكرة الجمال النسبي ..يرسم صورة حق البنات انه اذا ماكان شكلج نفس أميرات ديزني فانتي مو جميلة وبالتالي انتي شريرة  - واذا لاحظتوا انه اميرات ديزني كلهم يتشابهون ، ياسمين (اميرة علاءالدين ) تشبه بيل (الأميرة والوحش ) اللي ثنتينهم يشبهون ازميرالدا (أميرة احدب نوتردام ) .

 

ثانيا: لازم كل قصص ديزني فيها قصة  حب ،   الأميرة لازم يكون معاها  بطل تعيش معاه غراميات حتى لو ماله لزمه بالقصة  ، و العكس صحيح ..اذا كانت القصة عن بطل  فوجود البطلة أمر ضروري من ضروريات تسويق ديزني لافلامها عشان تمشيهم على البنات الصغار ، وأنا أحب اشكر ديزني على فلمها الاخير (brave) اللي تكلم عن علاقة الأم وبنتها بدون ما يقحمون رومانسية مالها اي داعي بالفلم ، توجه يديد وايد حبيته واتمنى انهم يستمرون فيه .

 

ثالثا: أغلبية القصص اللي يعرضونها  البطلة تكون فيها سلبية ومافيها أي مميزات غير انها جميلة ، غالبا تكون طيبة إلى درجة الغباء و لازم البطل اهوه اللي يحررها ويحل معضلتها ، لازم الأميرة تكون منكسرة وضعيفة الشخصية ومظلومة ومضطهدة  ..صورة الانكسار هذي كلش ما حبيتها ، والهوان والبرائة الغير مبررة اللي تكاد توصل لدرجة السذاجة هم ما حبيتها ، هالنموذج يرسخ فكرة انه المرأة كائن ضعيف ينوكل حقها بسرعة بحاجة دائما الى رجل عشان يطلعها من الازمة ، أوكيه أنا مع فكرة انه المراة بحاجة لرجل  مثل ما الرجل بحاجة لمرأة ، بس سالفة انه بدونه العيشة تكون جحيم والناس بستضعفني وبينوكل حقي فيها !! سوري ديزني ..بس هالفكرة غلط .

 

مثال على كل هالكلام اللي قلته :

 

(سندريلا)

 

أكثر قصة ما احبها من قصص ديزني ..وفعلا تمثل نموذج سيء حق البنات الصغار انهم يحبونها ويعيشون في خيالها ...

كلنا نعرف قصة سندريلا وماله  داعي اذكرها ، بس انا لمن كبرت و فكرت بقصتها ..استوعبت ان  الاخت (سندريلا) وايد معطية مرت ابوها ويه ..خو صرخي عليها وردي عليها بجم كلمة وخلاص ..تنجعم وتردلج حقج ، حالة ضعف الشخصية اللي فيها شي يبط الجبد واحس برائتها مفتعله ! يعني لازم تنطرين ساحرة تساعدج وتسويلج  حذاء سحري عشان تعجبين أمير البلاد  ، وبعدين ترى سندريلا مهي هينه ! ..وين البرائة فإن هالحذاء السحري ما يه على مقاس ريلها اهيه بروحها ! دام السالفة جذيه ليش انفصخ من الأساس !!غير ما اهيه مخططة على هالشي من زمان ..يعني الاخت تعرف تاخذ حقها ..يعيني مو هينة ..يعني ماله داعي كل هالانكسار جدام مرت ابوج ..هذا وان كان يدل على شي ..يدل على ان مرت أبوج كانت عارفتلج  من البداية ! هههههه (سوري اندمج ) بس مثل ما تشوفون مجموعة رسايل غلط وعدم منطقية بالقصة ، مادري عنكم بس أنا أشوفها جذيه .

 

اوكيه نتكلم عن أميرات ديزني اللي احبهم ..

 

الأميرة والوحش :)

 

جميلة وذكية ، ليش اهيه ذكية ؟ لأنها تقرا :))) -تصفيق حاد  لأن حب القراءة من أبرز القيم اللي لازم تنغرس بالأطفال -

وبعدين ما اهتمت بشكل الوحش وخافت منه كثر ما كان همها انها تضحي بنفسها عشان تنقذ أبوها من السجن -جك جك جك تصفيق مرة اخرى لأن هم التضحية قيمة حلوة للأطفال انهم يتعلمونها - واخيرا فكرة انه الأمير صار وحش لأن الساحرة لعنته بشكله لأنه كان مغرور بجماله وسطحي لدرجة انه يحكم على الناس من أشكالهم -تصفيق  جماهيري مدوي مثل تصفيق جمهور الموسيقار ياني بحفلاته في الهواء الطلق لأن هذي القيمة اللي انا قاعدة اتكلم عنها من الصبح

 

مولان

 

مولان بنت مجتمع معدة بأنها تكون زوجة وأم  حالها حال باجي البنات ، فشلت في اختبار خطابة الفريج وهالشي خلاها تطلع من حسبة  الزواج وفشلت اهلها  ، وفي الوقت اللي انطلب فيه ابوها للجيش عشان يشارك في حرب الصين ضد الهون فضلت انها تروح بداله عشان تبعد أبوها عن مخاطر الحرب اللي اهوه مو بحاجه لها لأنه صحته على  قده ..مع ملاحظة انه دخول المرة في الجيش الصيني يعد عار بذاته أكبر من عار فشلها في الزواج ..والنتيجة شنو كانت ؟ انقذت أبوها والإمبراطور الصيني نفسه والصين بكبرها من جيش الهون بعد سلسلة أحداث ومفارقات ومغامرات تموت من الضحك تشوفونها خلال الفلم ..الملخص : الفلم يعرض قدرات المرة لمن تنحط بقالب من مجتمعها ويصنفها ويحط لها حدود وشلون اهيه تقدر تتخطاها وتتجاوزها والنتيجة عقبها تكون انقاذ المرة لنفسها وللمجتمع ككل ..قضية تحرير المرأة باختصار -هذا اللي انا فهمته :)

 

هذي بنات أفكاري فيما يتعلق بأفلام دزني وما أنكر اني من متابعينهم بل منتظرينهم وأصلا ما شفتوني شسويت بدزني يوم صورت مع الاميرات هناك هههههه ...واي نعم صورت مع سندريلا مع اني ما احبها :p

 

وفي نهاية قرقتي احب اترككم مع هالسؤال ؟ حق البنات بالتحديد : منو أميرة ديزني المفضلة عندج ؟ :)