لحياة أفضل ..أطلقوا الشحرورة التي بداخلكم :)

 

 

 

 

 

نهاية سنة وبداية سنة ثانية ...عمر يديد وحياة مقبلة ، اللي راح صار ذكرى سواء حبيناها والا لا ..واللي ياي شي ما نعرفه شنو اهوه . حلو انك تتعلم من الي صارلك وتخطط حق مستقبلك ، لكن الأحلى انك توقف لحظة ..تاخذ نفس وتستوعب اللحظة ، تفكر باللي عندك ، تفكر باللي صارلك ..وتعيش اللحظة ، هالطريقة اسميها العيش على طريقة الشحرورة :)

الشحرورة صباح اللي ماخلت ولا بقت شي ما خلته بخاطرها وعاشته ، ليلحين بعمر 86  سنة تلبس و تتمكيج وتكشخ حتى لو اهيه ما تقدر توقف وتتسند على الطوفة ..وايد ناس تنتقد لبسها وبهرجتها ، واللي يبط جبدي اللي يتطنز على عمرها ويطلعون نكت عليها ..يا جماعة العمر بإيد الله انتوا مالكم شغل  ! محد فيكم فكر ليش عمرها طويل ؟ ليش ما قصرت عمرها الأمراض !  ليش ما انهت حياتها ضغوطات الحياة ! صج انها كبرت وعرفطت وجعدت ..بس صوتها بالنسبة لعمرها وايد زين ..اللي خلاها تغني أغنية (يانا يانا) قبل  جم سنة مع رولا سعد  ..وطبعا ما راح اتطرق حق شعرها -تبارك الرحمن - ولا كأنها عيوز بتدش التسعين خلال جم سنة  !

 

مرة بمقابلة تكلمت وقالت : " أنا عودت نفسي اني ما شيل بقلبي وانسى كثر ما أقدر الأشياء اللي مو زينة بحياتي " ..باعتبارنا بشر كلنا نمر بضغوطات ، وكلنا نتعرض حق إساءات ، وكلنا اكيد انطبعت  بحياتنا مرحلة سودة ما نقدر نلونها ، بس الحلو بالشحرورة انها ماخلت هالشغلات توقفها عن حياتها ... كثرة زواجاتها ، وادمان بنتها للمخدرات وأشيا وايد ما وقفتها عن اهتمامها بنفسها وكشختها ، ما وقفت ابتسامتها الحلوة ولا حتى شغلت بالها فيها ..هذا اللي عاجبني فيها . أوك يمكن اهيه بمرحلتها الحالية لبسها ومكياجها يعتبر أوفر حق وحدة بسنها ما ننكر هالشي ، بس الحلو فيها انها مونسة روحها  ومو عايشة على اساس انها بتموت باجر ...يمكن عشان جذيه اهيه ليلحين ما ماتت .

 

محد ينكر جمالها ..شعر كثيف ، شقار حلو ، طول وتربرب مطلوب ، وثقة بالنفس خلتها تقنع الناس انها ملكة مسرح ، خفة دم وروح مرحة ، مع العلم اهيه تربت ببيت عمره ما عاملها على انها جميلة ..عاملوها على اساس انه اختها اهيه الحلوة وانه اهيه  راعية النكتة ، فعلا صباح لمن تفكرون فيها تمثل درس عملي على شلون انه  برود الأعصاب يطول العمر .

 

صديقة لي مرة قالت : احنا نضيع وقتنا بس ننطر شي معين ، ننطر العطلة لين تيي عشان نستانس ، ولمن تيي العطلة ننطر العطلة اللي عقبها عشان نستانس ..انزين والوقت اللي ضيعناه واحنا ننطر ، ترا  ضاع هباء منثورا .

الرسالة اللي أبي أوجهها حق نفسي قبل ما اوجهها لكم  بأخر يوم من سنة 2013 وبداية سنة  2014  أهيه : عيشوا اللحظة ، بردوا على نفسكم ..لا تشغلون روحكم بالتفكير .

 

 

 

 

وسلامتكم وتعيشون ..وكل عام وانتوا  بخير وصحة وسلامة  :)

 

               محكورة بالبيت بسبة الأجواء الماطرة الغارقة اللي بالديرة ، وقاعدة اسمع اغنية (دنيا سمير غانم ) اليديدة  (قصة شتاء )  اللي اقل ما يقال عنها انها تهبل ، دايما المطر مرتبط بقصص حب ، صوت دقة المطر مرتبط بدقات قلب كل عاشق وولهان ، منظر قطرات الندى على الدرايش مرتبط بدموع واهات ونطرة ، قعدت افكر بافضل قصص الحب اللي مرت علي أو أشهرها وموقفي منها  ، فقلت  خل أنزل موضوع  عن قصص الحب انعرفت بالاعلام  وافصصها ..ممم مو فاهمين قصدي ..الحين راح تفهمون :

 

                                                                          

                                                                            روميو وجوليت

الحب = روميو وجوليت ، قصة من كلاسيكيات العشق والعشاق ، حبيبين ايطالين ما قدروا يتزوجون نظرا لخلافات اهلهم فانتحروا باسم الحب والهوى اللي ، اللي انا أشوفه انه  الموضوع ما يتعدا  قصة حب بين مراهقين اثنينه اشتطوا بحبهم حيل ، وما عرفوا يتصرفون لمن  حاولو يحطون أهلهم جدام الامر الواقع وفشلت خطتهم بتخريعهم  بأخذ السم وماتوا من صج !  وعلى فكرة في فلم ييد نازل حق القصة  متحمسة وايد اني اشوفه .

                                                                        

                                                                              لولوة وناصر

 

 

 

 

 

 

أبطال قصة مسلسل ساهر الليل اللي  حقق نجاح منقطع النظير واللي  المفروض الكل تعلق بقصة حبهم ، بس الصج عاد الكل تعلق بفكرة السبعينات اللي كان للمخرج محمد دحام الشمري السبق بإنه يتطرقلها  والا القصة عادية ومكررة وماكان بين هالثنائي شي مبهر غير انهم قدمو شي يديد ، والا حقيقة : لا هيا عبدالسلام تعرف تتحجى ولا عبدالله بوشهري يعرف يمثل !

                                                                       

                                                                   كيت ووليام

وحدة حبت أمير وكانت معاه بالجامعة ، حبها وتعلق فيها وأصر انه يتزوجها واهيه تتغلى عليه ، وما تزوجته إلا عقب ما وقعت عقد  انه الأعراف الملكية ما تمشي عليها واهيه حرة بحياتها ، خذت خاتم ديانا المشهور للزواج ولبسته وسوت لها عرس حضروه الملايين المملينة من الناس ، كلمة وحدة أقولها وحاجب واحد مرفوع : مصيبة !!!

                                                                     

                                                                  عبدالقوي وبياضة

           

                  حلو انه الوحدة تتزوج ريال عود كبر يدها ، على قولتهم الشايب يدلل والشاب يعلل ....هههه لالا أتغشمر:))))

 

 

                                                

 

                                                 جاك وروز

 

 

 

 

 

 

                               

 

 

هالفلم أثر وايد في نشاتي واعتبره فلمي المفضل بس بصراحة كنت أشوف روز وحدة ماعندها  سالفة وضيعت على جاك فرصة بانه يعيش لو انها هدته حزت غرق السفينة ووركبت قارب النجاة بناءا على طلب خطيبها ، بس حاليا عقب ما كبرت وعرفت شنو اللي سواه جاك بالنسبة لها بحيث انه كان نقطة تحول بحياتها وخلاها تتحرر من قيود كانت تخنقها حزتها ، وعلى الرغم من انه مات بغرق السفينة الا انه حياتها انقلبت 180 درجة من عقب ما عرفته وانطلقت بهالدنيا من عقب اللي صار وعقب العلاقة العابرة اللي كانت بينهم وكانت مليئة بالحماس والعاطفة والحرارة خلينا نقول ..يعجبني الريال اللي يسوي جذيه بحبيبته ، يطلقها بالحياة وما يكبتها ويحاول يخنقها ويخليها تحت إمرته وسيطرته ، عشان جذيه احب قصتهم .

                                 

 

 

                                ألحين بقولكم قصة الحب المفضلة عندي :

                                                                      

                                                                     مونيكا وتشاندلر

                                                                     

مونيكا البنت المهووسة بالترتيب والنظافة ، اللي عانت من سمنة سابقة وقدرت تتغلب عليها ، تشاندلر الساخر اللي الناس كله تفهمه غلط وينحط بمواقف غلط  بس لأنه وين ما يطقها عوية ، هالاثنين لمن ارتبطوا ارتبطوا صح وكملو ليه النهاية  ،

الصديقين الوحيدين من فرندز اللي بدت علاقتهم بصداقة وانتهت بحب عميق ..و هالشي انا وايد أحبه ، لان ماكو أحلى من انه يكون حبيبك أهوه صديقك والا شرايكم ؟!

 

 

 

                                            وبس تصبحون على مطر وعطلة وحب  .

 






 

(بو عبدالسلام ) حاب ينزل موضوع بالبلوق عن مدينة (بروج) البلجيكية اللي زرناها بشهر 3 اللي فات ..وبما إني اشجع المواهب الشابة وأشوف عنده ملكة سرد التقارير السياحية بطريقة جدا مرتبة ودقيقة أترككم مع سرده برحلتنا ..

(بوعبدالسلام )..المكرفون معاك :.........





                              عروس إقليم الفلاندر البلجيكي ...  

قنوات مائية و صوت صهيل الحصن و المراكب بكل مكان (بروج) كما يطلق عليها بالهولندية (brugge) من أحلى المدن البلجيكية الناطقة بالهولندية الي زرتها , هادئه , رومنسية , جذابه , تشبه بحد كبير فينيسيا الإيطالية , يسمونها البلجيكيين (مدينة العشاق) ,  تستاهل هالمسمى بإستحقاق  .


في و سط المدينة القديمة  يمنع  السيارات من المرور و ما تشفوف الا أعداد غفيرة من السواح و الحصن و بعض باصات السواح , هوى نقي تقدر تتمشى و تتسوق بسوقها المكشوف , الأبنية جدا قديمة و الكنائس أيضا  و إنت ما عليك الا تستمتع  بالأماكن السياحية المسجلة في اليونيسكو كتراث عالمي من سنة 2000 بما فيهم كنسية السيدة العذراء , كما تعتبر (بروج) من أكثر المدن باوروبا إستقبالاً للحفلات الغنائية طوال العام ، كانت أكبر ميناء تجاري لقربها من البحر ، اليوم صارت أكثر المدن البلجيكية إستقبالاَ للسواح



                                                  البداية

كانت من خدمة الكونسيرج بالفندق في بروكسل عاصمة بلجيكا عبارة عن الذهاب لمنطقتين تبعد عن العاصمة ساعتين و الي هي (جنت) و (بروج) قيمتها حوالي 100 يورو للشخص أخذنا الباص الصبح و طلعنا للمدينتين (جنت) بالبداية و الي فيها كنيسة عمرها أكثر من 1500 سنة بعدها للساحرة (بروج) قضينا فيها وقت ممتع ,  أغلب الباصات السياحية تصفط بمصافط عامة مخصصة للباصات السياحية و منها تمشي بغابة صغيرة فيها بحيرات تعطيك إنطباع أولي رائع للمدنية .

                                         الغداء في أحد المطاعم

 

 

الربيان الصغير كان مو خوش طلب , على كلام مشرف الرحلة إن يصيدونه من بحر الشمال و موجود بس على سواحل بلجيكا , طعمة كان زفر بزيادة !

(أنا ) >>: سوري عالمقاطعة بس كان طعم الربيان مو بس زفر !! الله يكرم النعمة كان أكبر مقلب بحياتي !!!


                                              المراكب السياحية


أخذنا جولة في المدينة و من بعدها مرسى المراكب , و قمت بأخذ صور سريعة للجولة مع عدد من السواح كان سعرها 10 يورو للفرد  .

صدت هل النايم  على الدريشه بلقطه أعتقد إنه ما راح تتكرر.

(أنا) >> : سوري عالمقاطعة مرة ثانية بس ..متأكد أنه أنت اللي مصور هاللقطة !! أذكر طاحت إيدي واحنا مارين بالمركب صوبه وأنا أرفع الكامرة عشان أخذ لقطة حلوة حقه !

 بعد الجولة بالمركب رحنا محلات الككاو عبارة عن شارع في محلات ككاو و الوافل البلجيكي كثيرة تقدر إنك تختار أي نوع من الككاو بعد ما تذوقه  , تم الإتفاق مع مرشد الرحلة على 3 ساعات حرة نشتكشف فيها المدينة , زرنا الساحة الكبيرة نافورة تتوسطها  و كافيهات على طول السكوير .

                                            نافورة ككاو بلجيكي

مبنى لم يرمم إطلاقا من 100 سنة  نفس الحجر و نفس الدرايش


                                                   بازار بروج



مع الجولة طحنا على محل يبيع تحف من نوع جديد عبارة عن بوكس داخلة ديكور لمهنة قديمة  (نجار , حلاق , خياط ) أو لديكور غرفة نوم أو مطبخ و ما شابه تعلق أو تقدر تحطها برف للتعرف على ما أقصد حطيت لكم صورة للتحفه الي شريناها .

 

المحل بكبرة حلو و مرتب  أغراضه مبتكرة و أنصح بزيارته موجود في الساحة الرئيسية للمدينة و معروف لدى أغلب الشركات السياحية .. كان سعر القطعه تقريبا 80 يورو للوحدة  و في أحجام أكبر و أصغر من هالحجم .

 

(أنا)>> : المحل كان عجييب ..القطع اللي فيه حق ديكورات بيوت وااايد روعة وتحسفت إني خذيت قطعة وحدة بس ومو أكثر من وحدة ! ..ونسيت تقول لهم إن سوقها وايد حلو وراقي ولو كان الوقت يمدي جان تسوقت فيها ..أسفة عالمقاطعة ، والله اخر مرة :)

 

 

 

بعض الباجات الي أخذتها من المدينة

 

 

 

 

 

 

بشكل عام الرحلة كانت ممتعة لكن  يعيبها ضيق الوقت , عن نفسي كنت أتمنى أقعد فيها أكثر لاكن برنامج الرحلة يحتم عليك 4 ساعات فقط بالمدينة , بلجييكا كمتوسط صرف باليوم أرخص بوايد من باقي دول أوربا و أسعارها معقوله جداً

 

 

خيارات الذهاب الى (بروج) ممكن تكون من هولندا ليوم واحد و العودة في نفس اليوم (Package) على حسب المناطق المراد زيارتها أو من العاصمة بروكسل

 

أحاوت قدر المستطاع توصيل المعلومة المفيدة بأسلوب بسيط  و شكرا على المتابعة .

 

 

 

 

 

                                                             

              البارحة  في البحرين

 محتفلين بعيد ميلاد (بو عبدالسلام ) ، وقلنا نزرق البحرين يومين نغير فيهم جو وأشوف فيها البحرين لأني مو شايفتها من قبل ، زرتها مرة بويكند قبل سنتين تقريبا ، بس الله وكيلكم من الطيارة ليه الفندق بعدين من الفندق ليه الكويت لأنه حزتها حاشتني نزلة معوية وما طلعت كلش خلال هاليومين ..فيعطيه العافية زوجي العزيز وراني اياها عدل قبل يومين .

 

على أنغام أغنية (البارحة ) لفرقة الأخوة البحرينية < يعني عايشين الجو ، وصلنا فندق (the majestic arjan by rotana ) بالمحرق ، حجزنا كان لأستوديو يطل على حمام السباحة  ، الأستوديو طابقين بالأرضي مطبخ تحضيري كل شي وصالة والدور الأول فيه غرفة النوم والحمام وغسالة .. وكان المفروض فيه كيكة ناطرتنا فيه بس ماوصلت لأسباب مجهولة 

انزف بسببها موظف الريسبشن لمن طلعنا من الفندق بالسلامة .

 

خلال يومين غطينا أغلب الأماكن السياحية المعروفة عندهم :

1- أكلنا  بمطعم (vapiano )  في مجمع السيتي سنتر صاحب أشهى طبق سباغيتي بالعالم - حسب راي بو عبدالسلام  واللي راح يفتتح قريبا بمجمع الأفنيوز.

2- تمشينا  بمشروع جزر امواج الساحر (مشروع قهاوي ومحلات عالبحر ) واللي ساعد إنه الجو كان ربيعي ووايد حلو  .

3-  زرنا شارع المعارض وشارع المطاعم .

4- رحنا محمية العرين للحيوانات الطبيعية  تعرضت فيها لمحاولة تحرش من (حمار) صج (حمار) عزكم الله  ، و  تضم المحمية  منتجع معزول ورومانسي وحلو للي يبحث عن الاستجمام . للعلم تذكرتها وايد رخيصة (دينار بحريني واحد للشخص ونص دينار للطفل وتفتح من الساعة الواحدة ظهرا )  .

5-  حاولنا ندش منتزه عين  عذاري الترفيهي بس كان  مسكر .

6-  تمشينا بسوق بوابة البحرين القديم .

7-  وختمناها بزيارة مجمع السيف المشهور ودخلنا فلم (ديانا ) اللي انصح الكل بإنه يشوفه .

 طول عمري اسمع انه البحرين صغيرة ..وفعلا اهيه صغيرة كحجم دولة ، ولاحظت انه صغر الحجم أثر عليها وانعكس على مساحات الطرق ، تخطيط المباني ، حجم المواقف ..نقدر نقول دولة خليجية ستايلها أوروبي  ونظام المرور عندهم أشبه بإنه يكون بريطاني ، وعشان جذيه حبيتها ..

دولة بحرية عبارة عن 33 جزيرة  ..وقاعدة تتمدد بالمساحة عن طريق دفان البحر ، أقل ما ينقال عنها انها شرحة ..شرحة بمعنى الكلمة ، هالشي طبيعي لأنه البحر يحاوطك بكل مكان وتشوف الزراق حواليك بكل تنقلاتك .

 

لهجتهم حلوة وتونس وأموووت على حرف الدال لمن ينطقونه :)

 

اللي بخاطره يغير جو ويرتاح بعيد عن الضجة راح يستمتع بأجواء مضيافة وهدوء بدولة خليجية تعتبر الأقدم والأعرق من بين الدول الخليجية (حضارة دلمون ) .

 

 

روحو اشتروا حلوى شويطر من موطنها الاصلي(محلات حسين أحمد شويطر)  ودورولكم متاي شغل عدل ..أنصحكم تاخذونهم يا من سوق بوابة البحرين ‘ أو السوق القديم اللي بالمحرق ..وبطريجكم أخذو عبي من هناك لأنهم يشوقون  .

 

بالأخير : أحب أعتذر من رفيجتي البحرينية عقيلة لأني ما تواصلت معاها لمن كنت هناك ، انا رحت  لمدة يومين وكلشي صار عالسريع . 

                                                               دعوة للتأمل والإحباط 

 

 

موضوعي المفروض اني ما أتطرقله بمدونتي ..لأنه كبير وشائك ، بس لأني وصلت لمرحلة من الإحباط اللي ما عرفت وين أعبر عن مشاعري إلا هني ، فتحملوني شوي .

إذا كنت متفائل بمستقبل هالبلد ، وتشوف بصيص أمل من تصريحات قياديينها فأنا أهنيك من كل قلبي ، لأني للأسف الشديد ماني قادرة اتفائل ولا اتعشم بالخير بمشاريع راح تقوم ، أو تنمية راح تصير ، أو حتى وضع راح يتعدل ،  يمكن تشوفوني ابتسم  أو أضحك ..بس مو من الوناسة ، من القهر طبعا !

بتقولونلي ليش ؟! شصاير !! ...

بالنظر إلى مشاريع الدولة الحكومية  ، الموكل إليهم بإنجازها ، من آخر الثمانينات واحنا كلشي واقف عندنا ، هل افتتح مستشفى يديد ؟هل قصوا شريط جامعة يديدة ؟ هل شفنا مدن سكنية قائمة بحالها من ذاك الوقت ليلحين ؟ طبعا الجواب  ماله داعي أقوله لأن كلنا عارفينه .

اوكي مشاريع واقفة  ..هذي مشكله ولازم نحلها ، من المسؤول عن تنفيذها ؟  ، الجواب : حكومتنا الرشيدة ،  الزمن أثبت أنه حكومتنا مو سنعة . انزين ..نحمد الله على انه احنا عندنا دستور يكفل لنا حرية اختيار أعضاء مجلس أمة يمثلون الشعب وينوبون عنه في تشريع القوانين ، ويكونون  عيننا الرقابية على أداء الحكومة ، ولمن ينتخبون ناس ترفع راية الإصلاح في البلد  ويبدؤون في المحاسبة وينحل المجلس ، وبعدين ينتخب مجلس حليف للحكومة وبجيبها أصلا وهم ينحل المجلس ..، واخيرا ينتخب مجلس خليط مابين حكومي حليف ومعارض مصلح ، ويينا رئيس مجلس أمه يديد نتامل فيه خير ويصرح تصريح صاروخي فجر كل مشاعر الغضب والاستهجان اللي فيني ، ( الإشاعات من الشعب الكويتي الذي أطلقها على الحكومة هي سبب تعطل عجلة التنمية في الكويت ) ... تعليقي الشخصي على تصريح مثل هذا : لا والله !! احلف !

 

يعني هل تتوقعون خير من رئيس لمجلس الأمة ( رئيس السلطة التشريعية ) ..الرجل الثالث بالدولة اللي يرئس السلطة الرقابية على الحكومة وبإمكانه إنه عالأقل يقص علينا بتصريح أخف من هذا استهزاء بعقولنا بأنه يتعذر بأي شي ثاني بإنه يكون سبب من أسباب توقف عجلة التنمية غير إشاعات الشعب ؟! ..يعني ألحين ماكو فساد ..ماكو ضياع رؤية ..ماكو راشي ومرتشي ..لا بس شعب فاضي يطلع إشاعات تؤثر على أداء الحكومة المتزن -اسمالله عليها - فارتبكت الفقيرة (ألا وهي الحكومة ) ووقفت عجلة التنمية !! فقط لا غير .

 

بتقولونلي نعم أحنا شعب فاضي ومدلل ، ما راح أناقشكم بهالشي لأنه صحيح ..بس هذا تصريح من رئيس مجلس أمه !! يعني إذا كان عامة الشعب ساذج وضايع بالطوشة ومايفهم ، فإنه من المفترض لرئيس مجلس الأمة أنه يصرح تصريحات  تكون أكثر إتزانا وقابلة  للتصديق مو تضحك من القهر مثل ما ذكرت قبل شوي .

 

يعني لا حكومة ولامجلس ..فما راح نكد خير ..

 

كلامي كلام موظفة يديدة في إحدى وزارات الدولة كانت تسمع عن الفساد وألحين قامت تشوفه بعيونها ، حالها حال أغلبية الشعب اللي شايف وساكت إما لأنه تعب أو لأنه وصل لقناعة بأنه الكويت منجم ذهب كبير أخذ اللي تقدر تاخذه منه وتمشي لأنه إذا ماخذيت  أنت راح ياخذ غيرك وتفلس ، لا حب للوطن ..لاخوف على المال العام ..ولا لتطبيق القانووون ...هههه أصلا شخباري قانون ، ماكو على الواسطة اهيه اللي تمشيلك شغلك .

 

بتقولونلي هذا كلام وحدة ساذجة وجذيه ماشية الكويت من زمان ..بقولكم أنا خايفة من اللي ياي ، يعني أنا ألحين في دولة ما يزيد تعدادها عن مليون نفر  (يعني ما نعاني من كثافة سكانية )   قاعدة أعاني من سكن وصحة وتعليم ، باجر عيالي شبيواجهون ؟!!! خصوصا أنه احنا على طمام المرحوم وماكو مشاريع قاعدة تنجز ولا أكو شي قاعد ينتصلح ! بتقولونلي  إحنا ببلد فاحش الثراء من البترول اللي يبيعه ..ههه بضحك مرة أخيرة من القهر وبقولكم ببسمة شقاقية :  البترول مصدر ناضب يعني بيخلص بيوم من الأيام ..يعني مو دايم لنا  :)

 

اترككم مع هالرابط ..اغنية تعبر عن لسان حالي ولسان حال كل الكويتين

https://www.youtube.com/watch?v=R38kJRCUBYk

 

 

 

 

 

 

 

 

دعوة للقراءة ... شي بسيط عشان الكتب تدخل حياتكم

 

احترم الشخص اللي يقرا وأقدره وايد ، طول عمري أعتبر الدعوة للقراءة من مهام حياتي ..عشان جذيه عندي جم نصيحة تساعد الناس اللي ما تقرا  بحياتها إنها تبدي وتقرا ..وصدقوني من تبلشون بهالطريج ..راح تفرقون روحكم فكريا ونفسيا ، راح تحسون روحكم إنكم تنورتوا ، راح تلاحظون أنكم راح تعرفون تتكلمون وتعبرون عن روحكم أفضل ، لغتكم راح تتحسن ومفرداتها راح تزيد ، بتصير عندكم مواضيع تناقشونها وتطرحونها ..والأهم من هذا كله  انكم راح تستمتعون ، صدقوني :)

 

1-  ابتدوا بقراءة الأشيا اللي تعجبكم ..اذا كنتوا  تسمعون أغاني وتعجبكم كلماتها ، اقروا كتب شعر .. اذا كنتوا من متابعي الأفلام والمسلسلات (مثلي ) اقروا قصص ، ونقوا النوع اللي يعجبكم : قصص رومانسية ، تاريخية ، رعب ، بوليسية  ...، إذا كنتو تحبون تعرفون عن نفسكم وتبون تفهمون اللي حواليكم  اقروا  كتب التنمية الذاتية وتحليل الشخصية ، الفكرة انكم تنقون كتاب بشي حابينه ومهتمين فيه ..مشكله أغلب الناس اللي ما تقرا أنهم ربطوا القراءة بالدراسة ، خصوصا المواد اللي ما يحبونها لأنها شي مفروض عليهم ، فلمن تختار كتاب بشي انت تحبه ..راح يفرق الوضع معاك  .... خل يكون هدفكم القراءة للمتعة .

 

2- انزين ألحين قضبتوا كتاب وبلشتوا تقرون فيه ..خلو معاكم قلم  و دونوا ملاحظاتكم الشخصية على أي شي يعجبكم ، معلومة يديدة تمر عليكم ، شي تستنكرونه ومو مصدقينه ! ..اخذوا راحتكم  بإنكم تخلون كتابكم شي شخصي لكم ..جذيه راح ترتبطون فيه  وتحسون انه قرائتكم  جزء من  حياتكم ..وصدقوني ماكو أحلى من لمن تردون تفتحون كتاب كنتوا قارينه وتقرون ملاحظاتكم عليها ..عاد يا تفطسون من الضحك يا تعجبون بروحكم:))))

 

3- تهيئة مود القراءة شي أساسي بالبداية ،  سوو لكم اجواء هادية بإضاءة خافتة بس مريحة للعين عشان تركزون وانتوا تقرون ، شربوا شي لذيذ  مع قرائاتكم ..، وافضل وقت أنا عندي اياه للقراءة اهوه قبل النوم  .. شوي شوي لين تتعودون وتصير القراءة جزء من روتين حياتكم لدرجة انكم تقدرون تقرون بأي وقت وأي مكان ، خصوصا إذا كان الكتاب وايد حلو فما تقدرون تهدونه .

 

4- لا تغصبون روحكم عالقراءة إذا ماكنتوا بالمود ، مثل ما قلت بأول نقطة الهدف اهوه القراءة للمتعة واحنا مو قاعدين بمدرسة ، مثل ما المعدة تتعب لمن تتغصب عالأكل الزايد ..العقل نفس الشي ..مو القراءة غذاء العقل ! 

 

5- حاولو أنكم تخلون القراءة نوع من التحدي بالنسبة لكم ..تحدوا روحكم شكثر تقدرون تخلصون كتاب خلال مدة معينة ..مثلا حطو هدف انكم تقرون خمس كتب خلال سنة ، جذيه كل ما تخلصون كتاب تحسون بإنجاز وإذا خلصتوا الكمية كلها راح  تفتخرون بروحكم .

 

نصايح بسيطة  أحاو ل اشجعكم فيها انكم تبدون تقرون وعندي لستة كتب اقترحها لكم  تنفع كبداية حلوة حق ناس ما قرت كتب من قبل  :

1- روايات الكاتب هيثم بودي ، تتكلم عن الكويت القديمة بحبكة حلوة  واغلب أعماله  تحولت لأعمال تلفزيونية ، أرشحلكم وبشدة رواية الدروازة كبداية حلوة لكم .

 

2-  اللي  حابين يقرون بالشعر ..نزار قباني أشهر من نار على علم ، ولغته الشعرية بسيطة وعميقة  الكل يفهمها ويرتبط فيها ويتذوقها .

 

3-  كتب الدكتور صلاح الراشد والدكتور ساجد العبدلي  بداية وايد حلوة حق أي شخص حاب انه يطور من نفسه ، اسلوبهم  سلس ومترابط ويستفاد منه بشكل كبير  لتطوير حياتكم والتخطيط بشكل أفضل لها .

 

4-  الروايات المصرية للجيب  ..سلاسل حلوة وممتعة للناشئة  وهم للكبار ، تضم تشكيلة كبيرة من  كل أنواع الأدب ،  طبوا وتخيروا فيهم ..والحلو فيهم انهم صغار وخفاف وتخلصونهم بسرعة  .

 

 

 

 

 

 

15  فكرة ....بعد 25 سنة على  هالدنيا .

الأسبوع اللي طاف احتفلت فيه بعيد ميلادي الخمسة وعشرين ..كملت ربع قرن ..وحسيت أني كبرت عقب مالاحظت أني قمت أروح الدوام ، لازم أشرب قهوة الصبح عشان أصحصح ، ما أحب  أطلع بالويك اند ، أفكر بصحون وجدور اشتريهم حق مطبخي بدال ما أفكر أروح أخذلي جم صبغ أظافر ..يعني شغلات قبل كنت أشوف الكبار أهمه اللي يسوونها وألحين أنا قمت  أسويها ..يعني أنا صرت من الكبار :(

المهم ..بغض النظر عن استيعاب أني كلمالي وقاعدة أقرب أكثر وأكثر حق سن الثلاثين  (السن اللي المفروض أكون فيه محققة ذاتي وأهدافي وكونت فيه قاعدة أعرف فيها شنو أنا بالضبط و شنو أبي أسوي بحياتي  وشنو موقعي من الإعراب أساسا من هالدينا )  قعدت واستوعبت أفكار  اكتسبتها خلال حياتي ..بعضها لمن استوعبته شب لمبة كبيرة فوق راسي ، وبعضها ضحكت عليها وايد من كثر سخافتها .. المهم أخليكم مع بنات أفكاري .. عددهم 15 وحدة :-

1- ماكو شي يظل على حالة ..كل شي بالدنيا راح يتغير مثل قطعة الثلجة لمن تطلع برة الفريزر ..بالبداية صلبة ومتماسكة وباردة وتصقع ..شوي شوي تشوفونها خفت برودتها وتقدرون تمسكونها بإيدكم ليمن ما تعود قطعة ثلج بالأساس وتصير ماي تقدرون تشربونه ..هذي اهيه الدنيا ..الشي الوحيد الثابت فيها أهوه : التغيير .

 

2- راحة بني أدم فوق كل شي ..خل يكون شعاركم بالدنيا راحتي أولا ..راعوا نفسكم ولا تجاملون على حسابكم  ..إذا كنتوا مرتاحين راح تريحون غيركم  ..اذا كنتوا سعيدين راح تنشرون السعادة حواليكم ..لاتفكرون إذا عطيتوا روحكم الأولية إنه هذا نوع من الأنانية بالعكس ..انتوا قاعدين تعطون روحكم حقها .

 

3- علم الطاقة وعلم البرمجة العصبية اللغوية (nlp)  وقانون الجذب مو شي يديد ...كلها علوم معاد أكتشافها من بعد ما اندرث مع ضياع العلوم اللي ابتدوها علماء المسلمين واندثرت مع حضارة الأندلس وعز العرب والمسلمين ..والا السالفة كلها مذكورة بالقرأن من زمان والرسول (ص) قالها بس أحنا ماكنا مستوعبين ..ربي سبحانه وتعالى  قال (لايغير الله ما بقوم حتى يغيروا ما بانفسهم ) ..والرسول  عليه وعلى أله أفضل الصلاة والسلام قال (انما الأعمال بالنيات ) .

 

4- كل الأوادم تكبر ماعدا نجوى كرم وشاروخان !

 

5-  التكنلوجيا الحديثة  بطرق التواصل الإجتماعي ما سوت فينا خير ..خصوصا مع الحريم ، أنا مقدرة نبل فكرة تسهيل التواصل  حق مخترع الواتس اب والانستقرام ..بس اعوذ بالله مجتمعنا  قدر يحول الانستقرام من برنامج تواصل واطلاع ومشاركة حياة ..لأداة مراقبة ومطالع  وحرب التعليقات واللايكات  بين الرفيجات والأزواج  والعوايل ..ناهيك  عن بلاوي قروبات الواتس اب  والهوشات الاسبوعية وهبت كلمن زعل طلع وتعالو ردوه القروب ..ملاحظة : جماعة (اللهم لا حسد ) ترا الانستقرام مو آب حقكم .... اذا تخافين وايد على عيالج وأغراضج وبيتج لا تحطين نص صورهم  والا تغبشين على ثلاث أرباع الصورة بحيث الصورة ما تكون واضحة !

 

6- مهما تطورت طرق الإطلاع والثقافة .. يظل الكتاب خير جليس في هذا الزمان ، أدري حجي مثقفين بس صج ماكو شي يمتع  الذات ويسحب الواحد ليه عالم ثاني تشغل فيه خيالك وتعيش فيه وتنعزل عن العالم كثر القراءة .

 

7-  من  متع هذه الحياة : نزلة المعاش ..وامتعها على الإطلاق : نزلة أول معاش !!  لانها تلخص دورك بهالدنيا والحياة شلون ماشية ..تتعب وتتعنى من الصبح وتكرف وترد بيتكم حزة الظهر  بهالشمس الحنانية  ما يغسل قلبك إلا حفنة من الدنانير تودع في حسابك تشغل خيالك بشنو تسوي فيهم عشان تدلع روحك ..تتعب بعدين تجني ... تزرع بعدين تحصد .المعاش قصة كفاح مصغرة عن الحياة .

 

8- لمن يطول شي تبونه على ما ايي ..هذا معناته اللي يايكم شي سنع .. عن تجربة صدقوني :)

 

9- يدتي الله يرحمها كله تقولنا احنا حفيداتها البنات : العيال سلاح الشابة ، بمعنى لازم تتزوجين وتييبين عيال وهالعيال اهمه بيكونون سلاحج وذخرج وأمنج وأمانج بحياتج ..فكرة حلوة بس قديمة ..أنا أستبدلها حاليا بالشهادة ..وأقول بكل رهات : الشهادة سلاح الشابة ، ماكو شي بيكون لج سد وحزام أمان من حوادث الزمان غير شهادتج ..للكل والجميع ..بس أخص البنات بشكل كبير .

 

10- من أحسن نصايح الجمال اللي فعلا فادتني وفرقت معاها بشرتي وجسمي شي بسيط محد يركز عليه : شربوا ماي ..كثروا من شرب الماي ..لا تنسون تشربون الماي .. ماي ماي ماي ماي ...

 

11- لو مجلس الوزراء يستوعب فكرة انه العبرة بالعمل الحكومي أهوه الشغل مو ساعات العمل ، ومجلس الخدمة المدنية شالو البصمة بالنسبة حق الأعمال اللي ما فيها تعامل بالجمهور ، او عالأقل استبدلوها بمرة وحدة تبصم بحيث أنك تيي تخلص شغلك وتمشي  بدون ما تنحكر بوقت معين بدوامك ..جذيه معدل الإنتاجية راح يزيد ، وراح تخف نسبة الزحمة بشكل كبير لأن عموم الموظفين ما يشتركون بوقت بصمة معين الصبح أو الظهر ..شرايكم فيني وأنا أفكر بانتاجية الموظف الحكومي وأحل لكم ازمة الزحمة :))))

 

12- على طاري الموظف الحكومي نصيحة لأي شخص يبي ينجز معاملة حكومية عند موظفة منفسة : مدحوا أي شي اهيه لابسته ، خاتم ..جنطة ..لفتها ..أي شي ، صدقوني راح تخلص شغلكم وتخفف من تنفيسها عليكم .

 

13-  القرار الأفضل لأي خطوة صحية بحياتك اهوه : المشي ..المشي راح يساعدك بشكل كبير حق  أي تغيير بحياتك ، تبي تنزل وزنك ..امش ، تبي تخفف ضغط ..امش ، تبي تقطع تدخين ..امش ، تبي تعدل نومك ..امش ، تبي تعدل نفسيتك ..امش (من نصايح دكتور أوز  وحبيت أشاركها معاكم )

 

14- أجمل ملامح  لإمرأة  مرت علي بحياتي : شريهان .

 

15 -  الحب حلو ..الحب أساس الحياة ..بس ترى الحب اللي نقراه بالقصص واللي نشوفه بالافلام  شي مو موجود ..هذا مو معناته انه الحب بالحياة مو موجود،  بس شكله غييير ..اللي تتزوج تفهم معناة كلامي ..واللي راح تتزوج لازم تحط هالشي ببالها .

هالبوست استوحيت فكرته من دعاية رمضان لشركة زين لرمضان 2012 اللي  تقول :

                                فكرة ..لو ضحكنا بوجه بكره ..

                                لو نحب اللي نكره ..

                                 لو غرسنا الأرض بذره ..

                                 لو منحنا الأمس عذره ..

                                 لو عطينا الوقت عمره ،

                                 لو لمسنا نور قمره ...

                                 لو حلمنا شوي .. 

http://www.youtube.com/watch?v=44l9tqI896Q      

 

 

 

سنة أولى بالمطبخ  :)

 

 

 

 

أنا أحسن  وحدة بالدنيا تعرف تسوي كورنفلكس بالحليب،  إذا في مسابقة حق أفضل طبق كورن فلكس راح افوز فيه وبجدارة :) لأني ملكة بالتفنن فيه ..، اقدر أحولة من سناك خفيف بين الوجبات إلى وجبة غذائية كاملة العناصر الغذائية وتشبع بعد ..أعرف متى أسخنه وامتى أقدمه بارد ..امتى استبدل الحليب باللبن أو الروب إذا لزم الأمر ..قلتلكم بهالشي محد يغلبني .

بس طبعا الوحدة لمن تتزوج المفروض أنها تكون أحسن وحدة تسوي مجبوس بعيون زوجها مو طرق الكورنفلكس والبيض والطماط .

عالم الطباخ خذاني بالاحضان عقب ما شفت مطبخ كامل بجولته وصحونه وجدوره تحت تصرفي .. . أنا اللي معروفه أحب أكل بس ما أحب أطبخ !.. المهم اعتبرت الموضوع نوع من التحدي وبما اني فاضية حاليا ورمضان ياي بالطريج قبلت التحدي بروح  رياضية وهمة عالية ..وبصراحة يازتلي السالفة .

جربت  برمضان اللي فات اني اسوي جم طبق ، وسويتهم ونجحت ، بس طبعا كنت أشتري مكونات كل طبخة واقول حق الخدامة تقص وتسوي وتشيل وتحط ويطلع الطبق زي الفل ..  أوكيه أنا ما أشيل دوري باللي سويته كله ، دوري كان أساسي  ..بس ما تعلمت منه شي ..بالنهاية هم توهقت لمن صرت بالمطبخ بروحي .. فاللي يبي يتعلم الطباخ لازم يسوي كلشي بايده ويتقنه بعدين يقدر يوصل مرحلة التفلسف والاشراف على الطبخة ..تقريبا مثل كلمن سوت روحها مصممة أزياء عندنا بالكويت واهيه كل اللي تسويه انها تطلع الموديل وتروح حق خياط هندي يسوي لها كل شي ..حبيبيتي ما ينفع تسمين روحج مصممة ازياء وانتي ما تعرفين تخيطين !

بالرجوع إلى محور حديثنا  .... بعد جم طبخة فاشلة وجم طبخة نجحت بفعل الصدفة لأني وايد ارتكبت أخطاء أقدر أقولكم جم نقطة تلخص أهم ما  تعلمته لمن حملت لواء السكين والمريلة :

1- أساس 90% من الطبخات اهوه انج تحمسين بصل وثوم  ، لذلك اذا كنتي تبي تختصرين وقت وجهد زهبيلج جم بايركسين حطي فيهم بصل مقصص وثوم مقطع لانج واايد راح تحتاجينهم .

2- لاتقصين بصل وانتي متمكيجة ..المنظر ماراح يكون حلو لمن تخلصين خصوصا لمن تكونين عروس :P

3- الصبر ثم الصبر ...عطي دائما  الطبخة وقتها على النار إذا ما تبين يطلع الأكل يابس وملزق وما ينعلج .

4- تعلمي تسوين عيش مشخول وتعلمي تقلين وجذيه تعرفين تسوين واايد طبخات لأن هالشغلتين من الأساسيات .

5- بعد القلاي ..الزيت اللي بقا تكبينه بجيسة وتقطينه بالزباله ، الدهن ما ينكت بالبالوعة عشان ما تسكرينها وتعفسين بيتكم عفاس .

 

الطباخ نفس ، وكلنا عندنا نفس ،  النفس اللي بالطباخ أهوه الحب ، لمن تطبخين وانتي حابة الأكلة وحابة اللي قاعدة تسوينه أكيد الأكلة بتكون لذيذة وراح تنجح ، وإذا ما نجحت مو مشكله ....مو مشكلة أنه تفشل معاج جم طبخة ..عيديها مرة وثنتين وثلاث وراح تضبطينها ..أنا ما أنكر اني طبخت أول أمس كشري فشل فشل ذريع ، بس راح أعيدها لين  اسوي كشري بمستوى الكورنفلكس اللي أنا أسويه ..والله على ما أقول شهيد :)

 

هولندا ..بلد اكتشفته مؤخرا :)

الأسبوع اللي طاف رجعت من رحلة شهر عسل زرت فيها امستردام (عاصمة هولندا) وبروكسل (عاصمة بلجيكا ) ، طبعا الأجواء كانت ساحرة هناك خضرة وجو حلو وتمشي  ورايحيين وراديين ووناسة وسوالف وبراد على قولة (محمد المنصور ) في مسرحية (عزوبي السالمية ) .

الدول الأوروبية عامة اللي يروحلها يعجب فيها خصوصا احنا الخليجيين ..أولا ننبهر من الخضرة والطبيعة و الجو الحلو ، ثانيا نتعجب من النظافة والقانون والانضابطية اللي عندهم  ..واخيرا نعجب بسماحتهم ورقي تعاملهم واحترامهم للبني أدم مهما كان اصله وفصلة ولونه وجنسه وشنو لابس .

لكن أنا شخصيا منبهرة في (the netherlands) -الاسم الرسمي لهولندا - واكتشفت انها أكثر من  دولة أوروبية مشهورة بالورد وجوها الحلو وبس ، اكتشفت انها حضارة بحد ذاتها ودولة بنت نفسها بنفسها وصنعت علامة فارقة حقها وتغلبت على ظروف صعبة خلتها الحين مصدر سياحة وزراعة كبااار جدا في أوروبا والعالم ككل ...

 

في (هولندا) و(أمستردام) بالتحديد تنتشر القنوات المائية ..نقدر نقول أنه بين كل قناة وقناة قناة ! طبعا شكل القناة المائية مع الشكل المعماري التاريخي القديم  لمبانيهم اللي محافظين عليه لحد الأن يعطي المدينة شكل جميل رومانسي يأسر القلب لكل من يزورها ..الشي اللي  عرفته هناك انه انتشار القنواة المائية عندهم سببه اهوه انخفاض أرض هولندا وهالانخفاض يسبب مشكله تجميع مياه ، وهالقنوات المائية المنتشرة ما هي الا وسيلة لحل مشكله الفيضانات المائية اللي يعانون منها بين فترة وفترة كل ماطق مطر او ارتفع منسوب المياه في البحر ..ودليل على مشكله تجمع الماي عندهم نلاحظ اغلب المباني عندهم مايلة ...تشوف مجموعة عمارات شكلها وايد حلو بتصميمها المعماري ووحدة منهم عوية ، تفكر انه المهندس اللي صممهم مايعرف يسوي شغله بس اتضح أنه المشكله بالأرض اللي تنبني عليه عماراتهم ومبانينهم الماي يأثر عليها ويخلي أرضيتها لينه فتلين وتميل وتميل معاها العمارة ..هالشي مخلي لعمارات امستردام طابع خاص مميز لها راح يلاحظة كلمن يزور هالمدينة .

                                   

                                                                    (لاحظو العمارة اللي بالنص )

 

اللي يشوف المساحات الخضرة في هولندا ويزور الريف الهولندي  يتوقع أنها بلدة زراعية درجة اولى ..لكن تلاحظ انه ماكو شي منتشر غير البقر ، تعدادهم السكاني بعدد أفراد الشعب يكون بحيث  يكون مقابل كل مواطن هولندي بقرة ..من كثرهم ! ليش مافي زراعة ؟! مرة ثانية الجواب أهوه : الماي ! ..الماي مأثر على تربتهم بطريقة تخلي ألات الحرث والألات الزراعية ما تستحملها التربة وتغوص فيها ..هالشي يخليك تقول حسافة كل هالتربة الخصبة والجو اللي يساعد عالزراعة ما يطلع منه خيار على الأقل !! بس الحلو بالهولنديين ما حطو ايدهم على خدهم وقالو شنسوي بعد تربتنا ما تساعد عالزراعة ..حطو حرتهم بالرعي وانتاج الأجبان ، وصارت هولندا من أوائل الدول المصنعة للجبن والمصدرة له .

 

 

طبعا زرنا هناك مصنع جبن وذقنا أنواع من الجبن ويبنا منه صوايغ حق الاهل :)

 

هولندا مشهورة بشيين : أولا أنها الدولة رقم 1 في زراعة الورد واهيه الدولة اللي تصدرة للعالم ككل بشكل رئيسي ، ثانيا : انها دولة تبيح كل المحظورات بالعالم ..المخدرات والدعارة هناك مسموح فيهم قانونا وفي أماكن تقدرون تروحونلهم عشان تمارسون انشطتكم هناك فيما يتعلق بهالمجالين بكل اريحية ..وراح أتكلم عن هالموضوعين تباعا :

 

أولا : الورد

 سبق وذكرت انه هولندا مو سهل انه ينزرع فيها على الرغم من التربة الخصبة والجو المناسب بسبب مشكلة الماي اللي يعانون منها، أرد وأكرر هالشي ما منعهم من زراعة أكثر من 6000 نوع من الورد من خلال معالجة أرضهم وتجفيفها بواسطة الطواحين اللي عندهم وقدروا يخلون وردة التوليب اهيه الوردة القومية مالتهم وتمثل شعارهم الرسمي على الرغم من أنها بالأصل ما تنمو عندهم ..يابوها من الصين وعجبتهم وظلو يزرعون فيها لين خلوها نوع رئيسي للانتاج بالورد عندهم وقامو ينتجون توليب بألوان وأشكال عديدة ومتنوعة ...اللي يروح هولندا لازم يروح حديقة كيكنهوف اللي تعرض جميع أنواع الورد اللي ينزرع بهولندا وتشوفون أنواع التوليب بعيونكم .

 

 

 

ثانيا : الحريات المقننة

عجبني وايد أسلوبهم في التعامل مع ما قد يعتبر من المحرمات والممنوعات في كل بلدان العالم والأديان ، احترموا حرية الأفراد وعطوا الكل مساحته وحريته ، تبي تجرب الماريجوانا ..عادي جدا ، في قهاوي معينة تقدر تروح لها وتطلبها ...تبي تمارس الجنس؟! في أماكن مرخصة تفتح ابوابها لك ، لكن وفي ثلاث خطوط تحت لكن ..كلشي بضوابط معينة ووفق تنظيم القانون ..بمعنى : أماكن الدعارة محددة وقهاوي المخدرات أيضا محددة ومايجوز أنك تمارس أنشطة هالأماكن بغير اماكنها ...توقعت أنا أني لمن اتمشى بشوارع أمستردام أشوف ناس محششين بالشارع أو أشوف مناظر مقززة للناس ، للامانة ما شفت هالشي ! لأن مثل ما قلت هالأشيا لها اماكنها واللي يخالف القانون يتعرض للمسائلة .

بس عشان ما أنفهم غلط ..انا اللي عجبني التقنين واحترام القانون اللي عندهم ، والنتيجة اهيه هولندا  أقل دول العالم بنسبة تعاطي المخدرات وجرائم التحرش الجنسي والاغتصاب !

 

اللغة الانجليزية اهية اللغة الثانية لأن اللغة الهولندية اهيه اللغة الأم أكيد  ، بس من تسأل أحد فيهم (do you speak english ?) يرد عليك بالانجليزي وبكل طلاقة  ..ما يتنيحس ويرد عليك بلغته مع انه يعرف انجليزي مثل الفرنسيين ، ولا يقولك يس يس واهوه ما يفهم انجليزي نفس الشعب الأسباني !  احب الشعوب اللي تهتم بلغتها وتراثها وبنفس الوقت مثقفة  وتتكلم لغة ثانية ، عشان جذيه قدرو يخلون طواحين الهوا اللي اهمه مشهورين فيها منذ القدم ألحين مصدر رئيسي لتوليد الكهربا عندهم بعد ما طوروها ..يعني ما تخلو عن ماضيهم واستفادو فيه حق حاضرهم ..طاحونه الهوا الحين عندهم تولد طاقة كهربائية تنير 1500 بيت .

 

قالتلي مرشدة سياحية في احدى الرحلات اللي خذيناها ( وايد ناس عندهم فكرة عن هولندا لأنها دولة تبيح المخدرات والدعارة بانها دولة الفساد ينتشر فيها ..بس اللي ما يعرفونه عنا انه احنا دولة قانون فقط لاغير ! ) والنتيجة كانت إني التمست اثار التزام الشعب بالقانون وتطبيق الحكومة القانون بحذافيره على الكل على دولة مثل هولندا تجعلها في مصاف الدول اللي زرتها واقدر أقول عنها (سنعة ) .

هالشي خلاني احضن تمثال ملكتهم (بياتريس ) في متحف الشمع هناك لمن زرته وتحسفت عليها بأنها تنازلت عن العرش مؤخرا حق ولي العهد ولدها (وليام )..الواحد لمن يشوف ديرة سنعة يدري انه حاكمها سنع وأنا أشهد انج سنعة يا (بياتريس )

 

 

الحين بعطيكم لستة بأشياء لازم تسوونها لمن تزورون هولندا :

1- لازم تزورون حديقة (كيهينكوف) للورد وتكون كاميرتكم معاكم وفيها ميموري عشان راح تصورون وايد فيها وراح تاخذ هالصور نص الميموري (من صجي والله )

2- تاخذون رحلة المركب بمدينة (ايفتلنج ) للملاهي ، المدينة في العاب للاطفال وقطارات موت وجندول بس هالمركب راح تكيفون عليه .

3- في السنتر مطعم يبيع فلافل اسمه (maoz) ويمه مطعم يبيع فرنش فرايز ويحط عليه صلصة تختارونها من أصل 22 صلصة اهوه يبيعها ..لازم اللي يروح أمستردام يجرب وجبة فلافل مع هالبطاط اللي مشهورة فيه هولندا وادعولي :))))

4- تروحون محلم (بريمارك ) وتشترون منه كسوة حق السنة كلها لأنه الشي الوحيد اللي يسوى انكم تتسوقون فيه هناك ..في ثلاث محلات (بريمارك ) بهولندا بس مو بالسنتر وتروحون لهم بالقطار من أمستردام والمسافة كلش مو بعيدة .

5- تسوون تجربة الرعب بدخولكم (the amesterdam dungen ) تجربة رعب على الأقدام تدشون فيها من سفينة قراصنة ليه بيت ساحرة لين تضيعون بشوارع أمستردام بالظلمة ..شي يخرع ويديد وحلو .

6- رحلة للريف الهولندي تروحون فيها مصنع جبن ومصنع قباقيب وتشوفون فيها البقر والمراعي وهايدي اذا صدتوها هههه.

 

وسلامتكم كان هذا اللي بخاطري أقوله عن هولندا :)

 

 

 

 

 

 

 

سعاد وصفاء ...أنيقات من بلدي :)

 

 

 

 

 

اخترت هالثنتين عشان أتكلم عنهم لأنهم فعلا يمثلونلي أيقونات أناقة (style icon ) بالنسبة لي كبنت كويتية .

كل ما يظهرون بالشاشة أو اعلاميا يطلعون بمظهر أنيق وحلو ..و عمري ما شفت عليهم شي غلط ، بالنسبة لي يمثلونلي الذوق الكويتي  الأصيل ..ال(simple) و ال(trendey ) وال(elegant)

 

 

ماراح اتكلم عن موهبة الفنانة سعاد عبدالله اللي خلتها تستحق لقب سندريلا الشاشة الخليجية لأن هذا مو موضوعي ، بتكلم عن ستايلها شلون شفناه تدرج معاها عبر السنين وكل مرة حسبتها صح  . سعاد عبدالله ابهرتنا من نفنوف العرس اللي شفناه بأوبريت مداعبات قبل الزواج ،وطبعا دراريعها  الراقين اللي لبستهم في أوبريت بعد العسل ، ناهيكم عن نفنوفها اللي تغنت فيه  ب"يلا خذني وروح يلااا" بأوبريت (بساط الفقر ) و اللي ألحين يعتبر اللوك المميز حق سعاد والناس تتذكرها فيه  ، حتى في مسلسل (زوارة خميس ) وبالمشهد الدرامي اللي كانت فيه (موزة) تعاتب فيه (ثنيان ) على خيانتها لها مع أختها وبكائها بحرقة لدرجة الهستيريا اللي كانت تتخيل فيه (ثنيان) بكل مكان تروحله وتعاتبه .. النجم الحقيقي  بهذا المشهد كان بالطوها اللي لابسته ..سعاد  بهالمسلسل كانت أأنق جدة مرت على بحياتي ... سعاد أثبتتلنا انه المرأة  بامكانها تظل انيقة وجميلة وستايلش مهما كبرت بالعمر وبيظل لها بصمتها الخاصة ، وبصمتها واضحة جدا مو بس على لبسها شخصيا هم نلاحظه على الممثلات اللي يشاركونها بالتمثيل بمسلسلاتها ..لمسة خاصة نعرف فيها انه سعاد عبدالله ورا هالنفنوف الحلو ، أو الشعر المرتب ، أو الجنطة المبهرة (لاحظو بثينة الرئيسي ومرام وفاطمة الصفي ولمياء طارق بمسلسل زوارة خميس وشوفو لمسات ماما (سعاد) -على قولتهم - عليهم :)

 

 

 

صفاء الهاشم وجه سياسي جديد نسبيا على الساحة الاعلامية لكن من الملاحظ جدا انه اسلوبها وستايلها لفت الأنظار بشكل كبير خلاها تنجح وتوصل (لقبة عبدالله السالم ) من ثاني انتخابات خاضتها ، أنا متأكدة أنه نفنوفها الأصفر اللي طلعت فيه في افتتاح مقرها الانتخابي بالانتخابات الأخيرة كان له دور كبير في نجاحها بغض النظر عن كفائتها وعن طرحها الانتخابي لأن مثل ماقلت هذا مو موضوعي وانا قاعدة أتكلم بالتحديد عن الشكل اللي طلعت فيه وبصراحة كان يهببببل وعجب وايد ناس مو بس انا :) ..هذا بالإضافة إلى لقائاتها التلفزيونية اللي كانت تطلع فيها بهذيك الفترة ولازالت لحد الأن كلما قابلوها ببرنامج تناقش فيه  أي موضوع يخص المجلس أو الحكومة او مستجدات الشارع السياسي الكويتي لابد ولازم يكون لبسها قد عبرعن حضوره وسجل اعجاب الناس فيه وغالبا  ما يتم تداول هالشي بالواتس اب كبرودكاست كالتالي : شوفوا لبس صفاء .

وفي لحظة من اللحظات لمن مسكت رئاسة المجلس بالنيابة في غياب الرئيس ..بصراحة كان شكلها حلو وايد  باللبس اللي لابسته على المنصة ، جدي ومحتشم وكلاس وحلو وهو المطلوب . واللي يعجبني بصفاء انها بمحافتها على أناقتها عززت أنوثتها ببيئة او مجال عمل وايد ناس تشوف انه المرأة ليه دخلته لازم إنها يا ما تكون تهتم بشكلها بالأساس ، أو أنها مع توليها المنصب راح تهمل اهتمامها بروحها وتصير (نائب) حالها حال زملائها ..صفاء اثبتت أني اقدر أنتقد بل أتهاوش مع وزير الداخلية و وأبتدي معاه رحلة المسائلة السياسية وأهدده بالاستجواب  هذا كله وأنا لابسة تراجي وعقد الماس (ينطقووون من كثر ما أهمه يهبلون ) - راجع أخر ظهور لها ببرنامج المشهد السياسي عالوطن .

 

 

 

 

الناس اذواق ويمكن وايد ناس ما يعجبهم ذوقهم أو لبسهم بس انا ذكرت ذوقي بلبسهم ومتأكدة أنه نسبة كبيرة من الناس يوافقوني بالرأي ..اعلاميا في وايد ممثلات وإعلاميات وناشطات سياسيات أنيقات ولبسهم حلو ..في منهم اللي نتفق عليه وفي منهم اللي نختلف عليه ..بس أنا اشوف انه سعاد وصفاء ما نختلف عليهم ...والا انتوا شرايكم ؟

 

 

 

رابط أخر لقاء لصفاء الهاشم في اللي طلعت فيه بالوطن

 http://www.youtube.com/results?search_query=%D8%B5%D9%81%D8%A7%D8%A1+%D8%A7%D9%84%D9%87%D8%A7%D8%B4%D9%85+%D8%A7%D9%84%D9%85%D8%B4%D9%87%D8%AF+%D8%A7%D9%84%D8%B3%D9%8A%D8%A7%D8%B3%D9%8A&oq=%D8%B5%D9%81%D8%A7%D8%A1&gs_l=youtube.1.0.35i39j0l9.3605.5039.0.7476.4.4.0.0.0.0.229.849.0j2j2.4.0...0.0...1ac.1.11.youtube.qVt6a9v91rQ

 

 

رابط من مسلسل زوارة خميس الحلقة 27 وتظهر فيه سعاد بالبالطو اللي تكلمت عنه

http://www.youtube.com/results?search_query=%D8%B2%D9%88%D8%A7%D8%B1%D8%A9+%D8%AE%D9%85%D9%8A%D8%B3+%D8%A7%D9%84%D8%AD%D9%84%D9%82%D8%A927+&oq=%D8%B2%D9%88%D8%A7%D8%B1%D8%A9+%D8%AE%D9%85%D9%8A%D8%B3+%D8%A7%D9%84%D8%AD%D9%84%D9%82%D8%A927+&gs_l=youtube.12...17774.18187.0.23855.3.3.0.0.0.0.243.613.0j1j2.3.0...0.0...1ac.1.11.youtube.LOyYlp5EUcQ

 

 

رابط لندوة صفاءالهاشم في افتتاح مقرها الانتخابي في الانتخابات الأخيرة

http://www.youtube.com/watch?v=p_GgbgWUgEs

 

 

رابط  مقطع من اوبريت بعد العسل ..ضحكو فيه واستمتعوا بالنجرة بين الشرايج ولاحظو دراعة سعاد :)

http://www.youtube.com/watch?v=l_RHGoZfiBI