مبروك المدام حامل :)

..شعور جدا جميل وممتع ويخوف ومحير بنفس الوقت ، خصوصا حق اللي تحمل باول طفل ، حبيت أنزل بوست يفيد الأمهات اللي لأول مرة يجربون هالتجربة  الغنية بمراحلها وتوقعاتها وواقعها .

 

 

بوستي اليوم بتكلم فيه عن الأشيا اللي حيل حبيتها وما استغني عنها بهالفترة واعتبرهم صاروا أصدقائي الصدوقين :)

 

 

 

بأول فترة من الحمل خصوصا الثلاث أشهر الأولى وهي فترة النساة اللي كانت حيل غثيثة ومليقة بالنسبة لي ، ما كان وجبة تظل بمعدتي حرفيا ..ما أنقذني إلا حبوب (أوندا ) ..من خذيتهم وانا احس جني كنت أجذب ، مفعولها وايد حلو ويروح الشعور بالغثيان والترجيع  نهائيا بالنسبة لي ..ما أقول بس الا (أوندا) يا بعد (اوندا )

 

 

 

 

 

 

 

 

الترطيب وااايد مهم حق بطنج وصدرج ، كل ما بجرتي بعملية ترطيبة كان وايد احسن حق بطنج عشان تخففين من ظهور خطوط التمدد ، وحق صدرج عشان يستعد حق فترة الرضاعة لانه راح يتكون فيه الحليب ..أنا شخصيا من اول ما حللت ودريت اني حامل  مريت (بوتس ) وخذيت البايو أويل وايد مفيد وحلو ، وهم عقب جم شهر خذيت من محل متيرنتي للحوامل اللي ب360 كريم بالمرز للوقاية من السترج الماركس بفترة الحمل ...يفضل الترطيب مرتين باليوم لنتيجة وايد حلوة .

 

 

 

 

 

 

 اسبوع عن اسبوع  وضعيات نومج راح تنحد كلما كبر بطنج ، وبالنسبة حق اللي متعودة تنام على بطنها وتحب هالوضعية راح تتعبين بالبداية -مثلي -  ، بس اللي حيل راح يساعدج لمن تنامين على جنب وبطنج يثقل ويتعبج  هالمخدة من مذر كير ، وايد تريحج وراح تفيدج عقب الولادة حق رضاعة البيبي ..في اللي أكبر منها وتقدرين تلفين جسمج كله فيها بس انا فضلت أخذ هذي .

 

 

 

 

 

 

 

دخلت الشهر الرابع وافتكيت من النساة الغثيثة المليقة ، طلعتلي سالفة الحارج المزمن ، اللي كان بالنسبة لي زي العسل مقارنة بلوعة الجبد ، فحلي بهالمرحلة اهوة دوا (جافيسكون ) اللي اشربه ومخليته يمي على طول واشربه مثل الماي ..وااايد يخفف الحرارة اللي راح تحسين فيها .

 

 

 

 

 

 

 

أنا لبسي من قبل الحمال كان اغلبه وسيع فما فرق على الوضع وايد الحين ، بس بنطروناتي بديت اتأزم منهم من اول ما دشيت بالشهر الرابع ، الحل موجود عند محلات مترنتي ، بنطرونات الحوامل عندهم تهبل مرييييحة جنج لابسة بنطرون بجامة مو جينز ووايد بنات قالولي انه ظلو يلبسونهم ليه عقب الولادة .

 

 

 

 

 

 

كتاب ماذا تتوقعين عندما تكونين حاملا ، كتاب شامل وفيه معلومات وايد اعتبره مرجع عندي وحاطتة يمي عالكمودينة قبل ما أنام ، وايد مفيد ، يتكلم عن الحمال أسبوع باسبوع بكل ما فيه  من أعراض ، حالة البيبي ، حالة جسمج ، شنو اللي تتوقعينه ، شنو اللي تتجنبينه ويجاوب عن أسالة بخاطرج أو شائعة ، أنصح كل حامل يكون عندها نسخة منه .

 

 

 

أحب أقول بالنهاية إن أهم شي بفترة الحمل انج ما تتعاملين معاه كحالة مرضية ، اهوة وضع صحي دقيق يحتاج عناية خاصة لا أكثر ولا أقل ..طبعا الحمال يفرق من وحدة ليه وحدة بكل مراحلة ، فيه حريم وايد يتعبون بهالفترة وفي حريم ما شالله ما يبين عليهم حتى .. اللي لازم تحطينه ببالج انه راحتج وسلامة البيبي أولا ، ثانيا اخذي الكلام من المختصين والخبرا والدكاترة ولا يضيعونج الحريم حتى لو من باب النصيحة لانه كل جسم يختلف عن الثاني ، وأخيرا النصيحة الأهم : استمتعي بهالفترة ...حتى لو كانت صعبة ، كوني فخورة بإن جسمج قاعد يصنع طفل كامل وهذي ميزة الله خصنا  فيها يالحريم .

 

 

 

 

 

 

 

 

 

 

احب تلقائيتها بكل شي ..اكثر انسانة مرت علي بالتلفزيون تريح اعصابي لمن اشوفها لأنها ما تتكلف بولا شي ، لا بأداء ولا بكلام ، لابلبس ولا بمكياج ، ..الإنسانة الوحيدة اللي تحسسني اني اقدر اكون جميلة باقل القليل ، وبدون جهد ..معتزة وايد بملامحها الاساسية وقاعدة تتعامل معاهم على اساس انهم نقطة قوة بشكلها ..تغير باللوك وتهتم بروحها وتجدد على بس بدائرة وحدة ما تطلع عنها لانها تحب شكلها وملامحها وصج فعلا قدرت انها تكون ايقونة ستايل و نوع من انواع الجمال اللي أنا شخصيا أفضلها وأحبها . اشوفها مثال حقيقي حق الشي اللي ادعوله : تقبلي عيوبج وابرزي مواطن قوتج .

 

 

 

 

 

 

 

 

 

 

مكياجها دائما وابدا بسيط يعتمد على ابراز جمال لون عيونها  الخضراء  فما  حست انه له داعي بانها تكثر ألوان او تغمجه ..والنتيجة اهيه لمن شفناها بدون مكياج  ما اخترعنا ولا انصدمنا ..كل مرة تكون بالمكياج احلى من بدونه ، بس  مو حلو انه يطلع ويه ثاني غير ويهج لمن تغسلين مكياجج .

 

 

 

 

 

 

 

 

 

 

 

عرفت انه من احلى ملامحها شعرها ، قصة شعرها في مسلسل فرندز بموسمة الثاني اهيه اللي شهرتها واغلبية نساء الولايات المتحدة الامريكية حزتها كانو يطلبون (قصة ريتشل ) - اسم شخصيتها بمسلس فرندز - بالصالونات لمن يروحون لها ، وعرفت انه اللون اللي يناسبها الأشقر فعمرها ما غيرت عن هاللون بتدريجاته وان حبت تغير صبغت بني بدرجاته ، وكثافة شعرها ماشالله تساعد على انه يكون طويل وهو بالضبط اللي صاير وان حبت تقصه قصته بحيث ما يتعدى طول حنجها عشان ما تبرزه لأنه حنجها وايد كبير ومو حلو .. مو نفس وائل كفوري اللي نحت حنجه وعفس ملامحه ..لانها تفضل الطبيعية بكل شي ..أكيد الاخت تسوي رتوش تجميلية ، مستبعد جدا انه ممثلة هولوودية ما تكون تعاملت مع مشرط جراح او ابرة خبير تجميل ، بس كله في حدود المحافظة عالشباب والنضارة والتلقائية باللوك ..مو نحت الويه وتثبيت ملامحه بشكل بلاستيكي يخرع ..

 

 

 

ثانيا الجسم ، اهيه ضعيفة وناعمة ، بس جسمها له عيوبه ، مرات كرشتها تنط وطلعت لها جم غلطة بانها لبست شغلا ت ضيجة ، بس اهيه عارفة انه أحلى ما في جسمها ريولها ، فوايد تعتمد عالقصير بظهورها بالمحافل الاعلامية ..مرة ثانية (ذكاااااء في التعامل ما ما تملك ) ..

 

 

 

 

 

 

 

 

 

طبعا بالنهاية لازم انقد مرات بساطتها اللي تكون في مناسبات معينة واايد اوفر ، مثلا شكلها في عرسها من براد بيت و أغلبية لوكاتها بالاوسكار ..ميخالف لا تركبين رومش واكستنشن وتلبسين جيبون تحت النفنوف ..بس عاد رفعي شعرج عالأقل .

 

 

ماكو فايدة حريم لازم نطلع عيب بالنهاية ههههههه .

 أنا انسانة محظوظة بإني قدرت اغير  مكان دوامي لمن ما عجبني ..

لله الحمد الله سهلي انتقالي لمكان يديد  عقب ما اكتشفت اني لو مكملة بمكاني القديم راح اتحول مع الوقت إلى مكينة جامدة تروح الدوام تفكر شنو تطلب فيه حق الريوق ، تتهاوش مع المراجعين وتحقرهم إذا بغت و تقضي وقتها تحش مع  الموظفات بباجي الموظفات اللي معاها وبس .

حسيت انه مكاني جامد وتعيس وماراح اتطور فيه إذا ظليت فيه  ..

 

طبعا تقدرون تستنتجون انه أنا كنت بوزارة حكومية لان هذي  اهيه السمات الرئيسية لها  بالديرة للاسف ، مكاني اليديد تقريبا نفس النظام  بس وايد افضل لمسماي وشهادتي والبيئة اللي اختلط فيها ، هالشي ريحني لأنه انا انسانة تستحق الأفضل ودايما اسعو للافضل يا جماعة ..هالشي من حقكم ولا ترضون بالقليل ان كان مو عاجبكم (هالنصيحة اتبعوها بالشغل وبغيره من أمور الحياة ) ..

 

 

 

المهم ..خلونا من فكرتي اليديدة عن منظوري بالحياة وبقولكم مجموعة نصايح لاي موظفة يديدة بادية حياتها العملية أو حتى قديمة إذا تقدر تستفيد منهم ..

 

 

اولا :  عرفي اللي لج وعليج :

إذا كنتي موظفة بوزارة عرفي انه لج أربع استئذانات بالشهر \ أربع عرضيات بالسنة (اللي اهمه الإجازات الطارئة ) \ 15 إجازة  طبية بالسنة وحاولي تقللين من أخذهم كثر ما تقدرين عشان ما ياثر على تقريرج السنوي

 

 

ثانيا : حرصي انه يكون تقريرج السنوي امتياز :

 لانه تقريرج الامتياز يترتب عليه حصولج على مكافاة الاعمال الممتازة كل سنة (البونص ) ، وحصولج على  الإجازات الدراسية والبعثات الدراسية اللي يقدمها مكان عملج .  واذا ما خذيتي فيه امتياز تظلمي منه عشان يصير امتياز، واذا ما نفع التظلم بوزارتج تظلمي بديوان الخدمة  وبالفتوى والتشريع  حسب  الاجراءات المتبعة اللي راح يقولونلج عنها الشؤون القانونية بمكان عملج .

 

 

ثالثا : اخذي المعلومة من مصدرها ولا تعتمدين  على حجي باجي الموظفات :

عندج سؤال عن الإجازة روحي قسم الإجازات ، عندج سؤال عن تظلم روحي الشؤون القانونية ، عندج سؤال عن  الراتب واستقطاعاته روحي المالية وهكذا ...

 

 

رابعا: استفيدي من الدورات اللي تقدمها وزارتج لموظفيها :

حرصي على انج تاخذينهم كثر ما تقدرين أولا لانها مفيدة  لج بمعلوماتها ، ثانيا فرصة لكسر الروتين بإنج داومين برة الوزارة بفندق او مطعم  ، ثالثا راح تنحط بالسيرة الذاتية مالتج وهالشي راح يفيدج عشان تترقين  أو إذا بتنتقلين من مكان عملج .

 

 

 

انيي للجزء الحلو بالموضوع ..اللي اهوه النصايح الاجتماعية بالدوام :- 

 

1- يمكن راح تنصدمون من كلامي بس خل ياخذون عنج فكرة من البداية انج موهينة وما تسكتين عن حقج ، ولا ياخذون عنج فكرة انج حليوة وطيبة وهينة عشان لا يركبون على راسج ، ميخالف دشي عليهم بقوة .. ما أقول تهاوشي من أول يوم وتلاسني معاهم ، بس اذا ما شي ما عجبج لا تسكتين وينوكل حقج ، خل يحطونلج حساب ، نصيييحة لوجه الله .

 

 

 

2- باب الحطات والعطايا والمناسبات الاجتماعية : باب لازم تتعاملين معاه بذكاء وحذر ، لأنه اذا انفتح ماراح يتسكر وراح تبتلشين ، انا مو ضد العطايا اذا كنتي تعزين اللي معاج بالدوام وبينكم علاقات شخصية برة الدوام ، بس انا اتكلم عن عطايا المجاملات البايخة بين الموظفات اللي معاج اللي تفتح باب المطالع ، ويبتو حق فلانة وعلانة بولادتها و رجعتها من الاجازة وأنا ما يبتولي ..يبا سكري الباب ولا تقعين بالفخ  .

 

 

 

3- قيل وقال : فلانة قالت ..فلانة سوت ، فلانة تتكلم عنج ،  تعاملي معاهم تحت هذا الشعار ( العيب مو من قال ..العيب من سمع ) واساسا من زين اللي قال عاد !   

قبل أن تتزوجي !

 

 

 

كوني انتي وعرفي شنو تبين بهالحياة

 حطيلج تصور حقج بشنو انتي تبين تكونينه ، تبين تكونين ربة منزل ، تبين تكون موظفة ، تبين تبنينلج مهنة وتنجحين فيها ، تبين تلتزمين دينيا ، تبين تهاجرين ، شنو ما كنتي تبين تسوين

  لمن تعرفين شنو تبين بهالدنيا  واخترتي مسار حياتج مسألة اختيار شريك حياتج راح تسهل عليج وايد ،  لأنج راح تختارين شخص يتوافق مع خطتج ومسار حياتج

 واذا كنتي اوريدي بمرحلة الاختيار بس ما تقدملج شخص مناسب راح اييج الشخص المناسب بعلم الطاقة لا تحاتين ، لأنه الأطراف المتشابهة تجذب بعض

 

 ..شفتوا بأفلام الكرتون شلون دائما وأبدا الشخصيات تلتقي بشخص يشبهها في نهاية الفلم ويحبها بالنهاية ، بالضبط هذا اللي راح يصير معاج .

 

 

الواحد ما يتحكم بالنصيب ، اذا يه الشخص المناسب ما اشجع الوحدة انها ترفضه

 بس أنا وحدة ما افضل الزواج المبكر ، يعني دائما افضل الوحدة ترتبط عقب ما تخلص دراستها

 أولا :عشان اهيه تنضج وتعرف شنو اهيه تبي 

 

 ثانيا :عشان تتفرغ للزوج والحياة اليديدة ..

 

والطموح يا بنات

 هالله هالله بالطموح

 اسعوا ورا احلامكم ولا تهملونها عشان ريال

 اخذيلج ريال يعينج بحياتج

 اذا حسبالج مسألة انج تطمحين راح تنحش الريال منج فإنتي غلطانة ..

سوري على هالكلمة بس ماكوشي sexy حق الريال غير بنت  تسولفله عن طموحها

 أصلا جذيه راح تساعدينه اهوه يبني نفسه واسمه وحياته .

 

الطموح اللي اتكلم عنه مو بالضرورة يكون مهنة  ناجحة ، أو اسم أو شهرة

 الطموح عبارة عن أهداف واضحة ترسمينها لنفسج وتسعين لتحقيقها

 ممكن يكون هدفج شي بسيط  جدا مثل حفظ القرأن ! أو تربية حيوانات ببيتج

 المهم تكون عندج رؤية واضحة للشخصية اللي تبين تكونينها عشان تعرفين منو تبين ترتبطين فيه .

 

وايد زيجات فشلت لسبب بسيط جدا-من وجهة نظري -  

 الصبي مافيه شي ، والبنية ما عليها قصور ،

 

 بس المشكلة كانت بالاختيار الخاطئ ، وليش صار هالاختيار الخاطئ ؟

 

لأن واحد من الطرفين مو عارف اهوه شنو يبي ، هذا اذا ماكانوا اثنينهم مو عارفين !

 

 

ما أحب ألعب دور المصلحة الاجتماعية او الللي تسوي روحها عارفة وفاهمة بكل شي ..

بس شي حبيت انبه عليه البنات بمجتمع ما يصبر على البنت انها تنضج على ما تتزوج

شغلة وحدة خل تكون ببالج ......عرفي شنو تبين بدنيتج قبل ما تدشين دنيا غيرج .

نصائح مكياجية (للعليمية فقط !)

1- المسكرة تعمل المعجزات بالنسبة للعين ..أبسط لوك في الوجود إذا كنتي تبين تطلعين عينج بشكل جذاب ، مسكرة وانقز ..بس طبعا لمن تحطينها عدل ، مو تفركين رموشج فيها مرة فوق ومرة تحت وخلاص ..خل يكون شعارج وانتي تحطينها مقولة (محمد المنصور الشهيرة بمسرحية عزوبي السالمية : ورايحين ورادين ..ورادين ورايحين )

2- استخدمي الفرش في وضع المكياج ، لا تستخدمين ايدج لانها راح تمص المكياج ، واستخدمي الاسفنجة كلمسة نهائية تطبطبين عليها بويهج عشان توخرين الخطوط اللي ممكن انها تطلع من استخدام الفرشة (هذا بالنسبة حق الفاونديشن والكونسيلر واللذي منه حق الويه ) أما بالنسبة حق شغل العين من شدو وخلافه استخدمي الفرش بس .

3- كخطوات لوضع المكياج ...حطي الشدو ورسمي عينج وبعدين حطي الفاونديشن ..عشان مرات الشدو يتناثر على ويهج ويوصخه خصوصا إذا كان مكياجج سموكي ، فالحل يكون انج تحطين فاوديشنج عقب ويكون شغلج جذيه أنظف وأرتب .

4- أي خطأ يصير بالميك أب  عشان تصححينه ، لا تمسحينه بالمزيل ، رسمي عليه بالفونديشن والكونسيلر ، جربيها وراح يفرق معاج الشكل النهائي .

5- إذا تبين الميك اب يثبت :  رطبي ويهج بكريم مرطب ، بعدين حطي كريم برايمر (عشان يثبت مكياجج ) ، بعدين حطي الميك اب ..وفي كريم برايمر حق العين بعد (حطيه قبل ما تحطين الشدو عشان يثبت ) .

6 - قلتها من قبل وأقولها مرة ثانية ، الفكرة الاساسية من المكياج اهيه انج تبرزين مواطن الجمال اللي فيه (تكبرين عيونج ، تبرزين شفايفج ،ألخ ...) وبعد تخفين العيوب الموجودة (الهالات السودة ،الحبوب وآثارها ، ألخ ...)  ، لكن كلش مو الهدف إنج ترسمين ويه ثاني فوق ويهج ، وتلونينه جنه كراسة ، إذا كان في تكنيكات تعلمناها من خبراء التجميل اللي من شانها أنها تعطي خدع بصرية للويه عشان تطلعه غير مثل تكنيك نحت الويه (الكونتور) ورسم الحواجب (التاتو ) وغيره ، فهالشي مطلوب  بالألوان الصح ، بالدرجة الصح ، وبالوقت الصح ...عشان جذيه البساطة مطلوبة وكل ما كان اللون طبيعي يكون وايد أحسن ، عزيزاتي البنات : المكياج الأوفر والي لا ينم عن الذوق بصلة ياريت تخلونه حق ثلاث حالات فقط :  حق الخدع المسرحية (إذا كنتي بتشاركين بمسرحية حق عيد الفطر مثلا )،  حق ترفيه الاطفال (إذا بتصيرن أرقوز ) ، واخيرا حق الهيلق ! ...وبس غير جذيه ياريت ما تحطونه من صباح الله خير وتخرعوننا بالدوام :)


نصايح هذا البوست برعاية دورة مكياج حضرتها عند خبيرة التجميل (زوزبيري ) أنصحكم بمتابعة اكاونتها ..

 

أصلي والا تقليد :))

 

 

 

 

سؤال : تلبسين تقليد ؟

سؤال : لمن تشوفين وحدة لابسة تقليد تعرفين انه تقليد؟ (انا قاعدة اتكلم عن التقليد درجة اولى )

سؤال : شكثر اللبس مأثر على ميزانيتج الشهرية (سواء كنتي مقتنيات - بفتح التاء وكسر النون - الماركات الأصلية والا تشترين تقليد وتقولين انه أصلي ) ؟!

 

ماراح أتكلم وأقول لبسوا ماركات والا لبسو تقليد ..كل واحد حر وكيفه  ، حسب قناعته وذوقه وميزانيته الشخصية .

 

مقولة سمعتها مرة وفعلا ركزت بمخي (الماركات  كذبة اخترعها التجار ليسرقوا فيها نقود الأغنياء ، فصدقها الفقراء !!)

 

 

حلو إن المراة تهتم بأناقتها وتلبس ما يحلو لها من منتجات معروضة ، وحلو إنها تدلع نفسها بمنتجات من الذوق الرفيع اللي يتسم بالجودة والبساطة والأناقة ، وتبارك الرحمن بنات الكويت ما خلو لا بقو من أحدث صرعات للموضة بانهم يتسابقون عشان يلبسونها ، لكن البنت اللي تتصرف كأنها بنت مهووسة بالماركات وحدود ميزانتها جدا متواضع لا تتعبين روحج وتحطين على روحج حمل بإنج تجارين (المجانين ) من البنات اللي تتفلسف واايد بانها تلبس كلشي ماركة عشان تصيرين شيك أند فاشن ، أصلا مو حلو جذيه ، حلاته البنت تنوع باللبس عشان نعرف امتى تصير كاشخة ، عشان يصير لها مزة ! ...

 

بنات الكويت حسسوني انه الروليكس يوزعونها مع التموين !!، وجوتي فالانتينو تلقينه بمحلات مال الله !!

 

أنا بالنسبة لي الذوق اهوه الاساس ، الأناقة انج تلبسين شي بتوليفة معينة تطلعين واو ، مو بغلي الشي اللي تشترينه ..وأنا اعتبرها شطارة وذكاء لمن أشوف وحدة لابسة شغلات تهبل وبسعر بسيط وعلى تركيباتها اللي تطلع فيها ..تطلع (واااو) .....شلون بالله هالفاشونيستات طلعوأ ؟!

لانهم ما يهايطون ! ..لمن تلبس من زارا تقول هذا من زارا ، لمن تشتري من مكياج المنصور بالمباركية تقول هذا من المباركية ، ولمن تشتري جوتي فلنتينو تقول هذا فلنتينو :)))

 

<<< الهدف من كتابة هذا البوست اهوه انه عاجبني جوتي فالانتينو ولوعتوا جبدي فيه من كثر ما شفته ..شكرا ، عفوا :)

 

 

 

 

 

لوبيتا نيونقو (lupita nyongo) ..وجه جديد عالساحة الهوليودية ، طلعت بفلم (12 عام من العبودية ) (12 years of slavery ) وطلعت بالرد كاربت مال القولدن جلوبز(golden globes)  هالسنة كأفضل نفنوف لفت الانظار ببساطته وجرأته ولونه الفاقع والمريح للعين بنفس الوقت....

 

 

 

 

وعقبها بجوائز الساق (the sag) لفتت الانظار مرة اخرى بنفنوف ازرق يحميها من العين ويحرسها  ..

 

 

 

 

 

 

 

 

 

واخيرا في جوائز البافتا البريطانية (bafta) لبست نفنوف أخضر أسر قلبي وقلوب الكثيرين من متابعينها اللي صارت لوبيتا بالنسبة لهم أيقونة اناقة (style icon)يحتذى بها......

 

 

 

 

 

 

 

 

 

 

 

 .. اللي يعجبني بلوبيتا انها انسانة عارفة عيوبها شنو ومحتضنتهم ، كتوفها عريضة بس عرفت شلون تلبس نفانيف تلعب فيها بقصة الكتوف مثل انها تغطيهم بكريستالات ورد أو تلعب بقصة النفنوف تخليه مثل الرداء ، ولون بشرتها صعب مو كل الألوان تكون حلوة عليه ، لكن هالشي ما خلاها تبتعد عن الألوان بلبسها  بالعكس ، قدرت بذكاء ومخاطرة منها انها تنقي الالوان بالدرجة الحلوة اللي تلوق عليها وتطلعها .....خلاصة كلامي اهوه : لوبيتا قصة قصيرة  عنوانها (عندما تعرف السمراء لنفسها !)

 

 

 

 

 

لوبيتا ذكرتني بوايد بنات مضيعين شكلهم لانهم مو عارفين حق روحهم  و مو متقبلين عيوبهم ، كلنا فينا عيوب ما في احد كامل ..شنسوي بهالحالة ؟ مو معنات انج تتقبلين عيبج بانج تطلعينه للأوادم وتلوعين جبدهم  فيه (مثل المتينة اللي تترصرص بالضيج ) الحل بسيط ..خشي العيب اللي فيج او عالأقل عرفي شلون تطلعينه  وسلطي الضوء على الاشياء الحلوة اللي فيج  نفس اختنا الحلوة اللي توني تكلمت عنها  .

 

 

هالكلام بيخليني اذكر لكم اكثر ثلاث عيوب مأزمة البنات وأحس لازم نتفهم طبيعتهم عشان نعالجهم أو خلينا نقول نحتضنهم ونتعامل معاهم بالطريقة  الصح ، فخل أقول لكم أكثر ثلاث كذبات مرت علي بعالم التجميل والاهتمام بالنفس :

 

 

 

 الكذبة الاولى :

 

 

(كريمات التبييض )

 

 

..الله خلقنا ببشرة ذات لون معين ، ممكن مع اهمالها  تتعب وتصير باهتة ، مع الاكل الغلط تطلع فيها حبوب ، بالعناية فيها ممكن تترطب وتصير ناعمة وتصير مشدودة ..بس مستحيييييل ، أكرر مستحيييييييل بكريم معين  تغير لونج وتصيرين بيضة ، هذي كذبة طلعوها شركات التبييض عشان يمصون فلوسكم .. و (fair and lovely ) أولهم .

 

 

 

الكذبة الثانية :

 

 

 

(الأماكن الغامجة تفتح بالتفريك )

 

 

 

..احنا العربيات من طبيعة أجسامنا انها ما تكون بلون واحد ،نظرا لطبيعة جو الجزيرة العربية  الجاف والقاسي  فبشراتنا تنشف ..ولمن تنشف تغمج ، فالحل  عشان تفتح هالأماكن  اهوه الترطيب ، من داخل شربوا ماي وايد ، ومن بره بالكريمات واللوشن ، مو بالتفريك وشدته لأنه مو وصخ ، اهيه جذبه قصو فيكم عليها رواعي الصالونات عشان تسوون الحمام المغربي والتركي وغيره ..سوي حمام مغربي وتفركي مو مشكله ، بس مو عشان تفتحين الأماكن الغامجة ..كان غيرج اشطر حبيبتي .

 

 

الكذبة الثالثة :

 

 

 

(العصالة احلى من التربرب )

 

 

 

.... خل تكون الرشاقة والجسم الصحي هدفج ، مو هدفج انج تكونين عارضة ازياء ، لان عارضة الازياء الهدف من وجودها اهوه انها الناس تشوف الهدوم عليها بالمسرح..يعني باختصار اهيه علاق يمشي . كوني ضعيفة رشيقة صحية هذا المطلوب منج   :)

 

 

   

 

هدى الخطيب ...لا تمثلني !

 

 

 

موضوعي اليوم بسيط وصغير ..مافيه كلام وايد ،  ...الأخت الفنانة هدى الخطيب مع احترامي لشخصها الا انها تمثل ظاهرة ستايلية فاشونستية جديرة بالدراسة لكل المهتمين بالذوق والرقي والأناقة ..لأنها عكس كل اللي قلته  ، طبعا بتقولون وايد ممثلات يهلقون باللبس وخصوصا في المهراجانات الخليجية العالمية -وهذي نقطة يبيلها موضوع بحد ذاته ، بس لأنه هدى الخطيب لمن تعرفون انها دارسة هندسة ديكور بجامعة أمريكية ودارسة في المعهد العالي للفنون المسرحية ، وتسمعون كلامها بالمقابلات وطلاقتها بالانجليزي ومنطقها وطريقتها بالكلام المحترمة  ، تنصدمون بانه الأسلوب اللي تتكلم فيه ليش ما ينعكس على ذوقها باللبس  اللي ما أنكر انه محتشم بس مووووو حلوووووو ، لبسها عبارة عن زحمة افكار ، ستمية ألف موديل في البدلة الوحدة وكلهم متنفذين بأرخص المواد ، إزعاااااج بصري ، اللي خلاني أنزل هالموضوع اهوة بسبب ان الأخت تطلع بلوكاتها في مهراجانات عالمية يحضرونها فنانين اجانب هي تمثلنا فيها ...هالموضوع عبارة عن صرخة احتجاج اعبر فيها بشكل واضح وصريح ....ياجماعة الخير : هدى الخطيب ...لا تمثلني !