walking across q8 :)

بعد التخرج ..والبطالة المفروضة علي ، الفرصة كانت ذهبية جدا بأني أمارس رياضة المشي بشكل احترافي واطورها لمستويات أخرى ..لأني كنت فاضية طبعا :p .. والحمد لله تجاهلت صوت السودانية الصغيرة اللي فيني وقلت حق نفسي : 1- سويتج السيارة بيدي ...2- عندي ساعات وساعات وساعات ابي اقتلها بشي مفيد  ..3- عندي رفيجة تسانع وكله تحن علي أروح ممشى منطقتهم ...هممممممم (ليش لا !) ومن هني كانت البداية ..بداية مشروع (المشي حول الكويت) (walking across q8)

بالتعاون مع صديقتي الصدوقة (مريم)  خلال سنة تقريبا قدرنا نمشي ونغطي اغلب مواقع المشي الشهيرة بالكويت: اليرموك ، قرطبة ، صباح السالم ، مشرف ، رميثية ، الشويخ ، المركز العلمي ، سوق شرق ، حديقة الشهداء ..الخ ألخ  ، وبصراحة الرحلة كانت وناسة ..بحسب حساباتي المتوااضعة قدرنا نمشي اكثر من 45 كم وعاد عدو جم خطوة لأن مالي خلق اعد :)
أقدر أعطيكم الtop five لأفضل المماشي بدولتنا الحبيبة الكويت .



في المرتبة الخامسة :
ممشى اليرموك

في المرتبة الرابعة :
ممشى الرميثية الجديد (اللي قبال فندق الريجينسي)

في المرتبة الثالثة :
ممشى شاطيء الشويخ

في المرتبة الثانية :
ممشى المركز العلمي

وفي المرتبة الاولى:


تررررررررررررررررررررررررر تشششششششش *صوت طبول تليها نقرة صاج*



ممشى مشرف 
بلا منازع  ويضم الأثنين القديم والجديد (اللي يسمى بالواحة)



طبعا فكرة (المشي حول الكويت ) هدفها الأساسي اهوه ممارسة الرياضة بطريقة تنسي الواحد أنه قاعد يمارس الرياضة بحيث انه يدمج فكرة المشي باكتشافه للكويت ، انا  ورفيجتي اكتشفنا أماكن  يديدة وحبيناها خصوصا لمن كنا نتخطى الممشى نفسه ونكمل المشي بالمناطق اللي اهوه فيها وهذا الشي صار في حديقة الشهداء اللي وصلنه فيه ليه الدسمة ومشيناها كلها ، وقرطبة و اليرموك ... .
انا شخصيا نفسيتي تعدلت من يوم ما بلشت أمشي ، وجسمي استفاد طبعا ، هالشي لاحظته لمن سافرت وكنت امشي مع ناس كانو يتعبون بسرعه .
والفكرة نفسها تطورت وكانت ممتعه  أننا كنا نتحدى انفسنا نحاول نكتشف اماكن يديدة نقدر نمشي فيها منها الجزيرة الخضرة (اللي فعلا مشينا فيها ) وسوق المباركية (اللي حاطينه باللستة )
الصحبة شي اساسي بالمشي ، اختار صديق معاك له خلق ويحب يجرب أماكن جديدة ، وأنا كنت محظوظة وايد بوجود (مريم) معاي اللي ساعدتني اني اعيش معاها هالمغامرة الصغيرة  وأوعدج (مريوم) انه الجو رد تعدل شوي راح نكمل المشوار  ونسوي اشياء اكثر وأحلى من اللي سويناها .

مدونة يديدة داخلة عالم التدوين .. حابة تسوي شي .. حسيت انه باب التدوين باب مفتوح للجميع فقلت انا شخسرانه ؟! وحسيت بعد انه يه الوقت اللي المفروض فيه افكاري وارائي وتحلطماتي تتعدى حدود اهلي واختي وانه العالم يسمع اللي ابي اقوله .. مع انه عندي اكاونت بتويتر بس ال١٤٠ حرف ما يبردون جبدي ساعات ..وهم حسيت انه هذي الخطوة كان لازم اقوم فيها من زمان ..وو حسيت بعد انه .. لحظة وايد حسيت وانا احاسيسي كلها غلط ؛) ما علينا .. حياكم الله فالخيمتنا ...قصدي حياكم الله في مدونتي المتواضعة ، noonytoons اسم اخترته لها لانه الاسم اللي كنت ابي احطه اوريدي ماخذينه -حسافة :( - .. معلومات بسيطة عن اختكم فالله : احم احم .. خريجة جامعة الكويت ومسجلة في ديوان الخدمة المدنية كباحثة عن عمل والله كريم .. مو عاجبني الوضع اللي صاير بالكويت وابي ديرتي ترد عروس الخليج مثل ماكانت وانشاءالله اكون من الناس اللي تردها -مع انه ما ادري شلون بسويها بس حاطته هدف - ..احب اقرا واحب اشوف تلفزيون وتوقعوا وايد اني اعيش دور الناقدة حق اعمال فنية واكتب عنها .. ما احب اطبخ بس احب ال اكل وعلاقتي بالاكل يحكمها الرجيم اللي راح تييكم اخباره ومعاناتي معاه .. واخيرا من هواياتي اللي احب اعلن عنها هني اهيه التحلطم لاني انسانة ما تعرف ترد على اي شخص يضايقها ( وهذا عيب انا لازم اشتغل عليه بس مو هذا موضوعنا ) ففرصتي اني اطلع اي بقبوقة بقلبي اهيه التحلطم .. و فرصة اني امارس التحلطم عبر التدوين لانه الواحد لازم يمارس هواياته ويطورها باستخدام التكنلوجيا الحديثة:) المهم هذي معلومات بسيطة عني اتمنى اني ما اكون طحت من عينكم عقبها وتخليكم تتابعوني وتتابعون تدويناتي .. استودعكم الله اللذي لا تضيع ودائعه - يعني منهم - وبس ؛)